काठमाडौं । रौतहटको बौधिमाई नगरपालिका–७, बंकुलस्थित सीमा क्षेत्रबाट स्राेत नखुलेकाे १४ लाख ८० हजार नेपाली रुपैयाँसहित एक भारतीय नागरिक पक्राउ परेका छन् ।

बिहीबार सशस्त्र प्रहरीले उक्त रकमसहित भारतको पूर्वी चम्पारण जिल्ला मोतिहारी झरोखर–७ जमुनियाका ३१ वर्षीय युवकलाई नियन्त्रणमा लिएको सशस्त्र प्रहरीका सहप्रवक्ता डीएसपी शैलेन्द्र थापाले जानकारी दिए । 

उनका अनुसार ती युवकलाई सशस्त्र प्रहरी बल नेपाल बोर्डर आउट पोष्ट सरमुजवाले नियन्त्रणमा लिएको हो । बीआर ०५ बीबी ६२१२ नम्बरको मोटरसाइकलमा भारतबाट नेपातलर्फ आउँदै गरेका उनलाई विशेष सूचनाको आधारमा नियन्त्रणमा लिएकाे डीएसपी थापाले बताए । 

उनका अनुसार ती युवकले मोटरसाइकलको सिटमुनि स्रोत नखुलेको पैसा लुकाएर ल्याएका थिए । ती युवकलाई बरामद पैसा तथा मोटरसाइकलसहित आवश्यक कारबाहीको लागि गौर भन्सार कार्यालय रौतहटमा बुझाइएको डीएसपी थापाले जानकारी दिए ।