काठमाडौं । उद्योग वाणिज्य तथा आपूर्तिमन्त्री दामोदर भण्डारीले निरन्तर घटेको बजेटको सीमा र वृद्धि भएको मागलाई सन्तुलन कायम गर्नेगरी मन्त्रालयको योजना तथा बजेट प्रस्तुत गरिएको बताएका छन् । 

बिहीबार विनियोजित मन्त्रालयत बजेट छलफलमा सांसदहरूले उठाएका प्रश्नको जवाफ दिँदै उद्योगमन्त्री भण्डारीले यस्तो बताएका हुन् । मन्त्रालयले विद्यमान आवश्यकता र मागको मूल्यांकन तथा वस्तुस्थितिको मूल्यांकन गरी आगामी आर्थिक वर्षको बजेट प्रस्ताव गरेको बताए । 

उनले निरन्तर रूपमा घटिरहेको बजेटको सीमा र बढिरहेको माग समेतलाई सन्तुलन कायम गर्नेगरी कार्यक्रम तथा बजेट प्रस्तुत गरिएको उल्लेख गरे । उद्योग वाणिज्य तथा आपूर्ति क्षेत्रको विकासको लागि नीतिगत स्थायित्व र कार्यविधिगत सरलीकरण गरी लगानीमैत्री वातावरण निर्माण गर्ने काममा मन्त्रालय निरन्तर प्रतिवद्ध रहेको उल्लेख गरे । 

सरकारले उपभोक्ता हित संरक्षणको लागि उपभोक्ता अदालत गठन प्रक्रियाका लागि बजेट विनियोजन गरिएको बताए । उद्योगमन्त्री भण्डारीले बजारमा माग उच्च हुने तथा मूल्य अस्वभाविक रूपमा वृद्धि हुन नसक्ने अवस्था दृष्टिगत गरी रणनीतिक रूपमा संयुक्त बजार अनुगमनलाई तीब्रता दिने उल्लेख गरे । 

उनले भने, "मन्त्रालयले विद्यमान आवश्यकता र मागको मूल्यांकन तथा वस्तु स्थितिको मूल्यांकन गरी आगामी आर्थिक वर्षको बजेट प्रस्ताव गरेको छ । निरन्तर रूपमा घटिरहेको बजेटको सीमा र बढिरहेको माग समेतलाई सन्तुलन कायम गर्ने गरी कार्यक्रम तथा बजेट प्रस्तुत गरिएको छ ।"