काठमाडौं । शिक्षा विज्ञान तथा प्रविधिमन्त्री सुमना श्रेष्ठले शिक्षक सरुवासम्बन्धी निर्देशिकामा परिमार्जन गर्न सकिने आशय व्यक्त गरेकी छिन् । मंगलबार मन्त्रालयमा आफ्नो १०० दिने कार्यकालका उपलब्धि सार्वजनिक गर्दै मन्त्री श्रेष्ठले यसबारे आपत्ति राख्ने सरोकारवालासँग अझै छलफल गरेर अघि बढ्न सकिने बताइन् ।

निर्देशिका जारी गर्नुअघि प्रदेशस्तरमा र शिक्षक संगठनका प्रतिनिधिहरूसँग पनि छलफल गरिएको उनको दाबी छ । तर, शिक्षक तथा व्यवस्थापन समितिको असन्तुष्टि रहे अझै यसमा थप छलफल गरेर जान सकिने उनको भनाइ छ ।

“हामीले गरेका हरेक नयाँ काम नै अन्तिम हुनुपर्छ भन्ने छैन । कतिपय नयाँ कामबाट अनुभव पनि मिल्छ, त्यसैका आधारमा अघि बढ्नुपर्छ,” मन्त्री श्रेष्ठले थपिन् ।

निर्देशिकाले सरुवाका लागि अनुभवलाई प्राथमिकतामा राखेकोमा शिक्षकहरूको असन्तुष्टि छ । पहुँचवालाले मात्रै सरुवामा प्राथमिकता पाएकाले त्यसलाई सरलीकरण गर्न अनुभव गणना गर्ने व्यवस्था राखिएको उनको जवाफ छ ।

यस्तै, शिक्षक सरुवा प्रक्रियामा विद्यालय व्यवस्थापन समितिलाई बाइपास गरिएको भन्दै व्यवस्थापन समिति महासंघले पनि आक्रोश पोखेको थियो ।

यस सन्दर्भमा भने व्यवस्थापन समितिले नै प्रधानाध्यापकलाई सल्लाह दिने भएकाले समितिको भूमिका प्रत्यक्षरूपमा नराखिएको उनले प्रस्ट पारिन् ।