काठमाडौं । प्रमुख प्रतिपक्ष दल नेपाली कांग्रेसले संघीय संसद् सचिवालयमा कार्यरत कर्मचारीले गरेको माग जायज भएको जनाएको छ । कर्मचारीका माग जतिसक्दो चाँडो पूरा गर्न कांग्रेसले सरकारलाई आग्रह गरेको छ ।

संसद् सचिवालयका कर्मचारीको आन्दोलनलगायत विषयमा सोमबार प्रतिनिधिसभाका सभामुख, राष्ट्रियसभाका अध्यक्ष, दुवै सभाका पदाधिकारी, प्रमुख सचेतक, मुख्य सचेतक, संघीय संसद्का महासचिव र सचिवालय सचिवसहितको बैठकपश्चात् कांग्रेसका प्रमुख सचेतक रमेश लेखकले यस्तो आग्रह गरेका हुन् ।

“उहाँहरूले गरेको श्रमअनुसार पारिश्रमिक र भत्ता पाउनुपर्छ । १५ वर्षको अवधिमा घरभाडा, महँगी, शैक्षिक भत्तालगायत विषय पुनरवलोकन भएन भनेर कर्मचारी साथीहरूले माग राख्नुभएको छ । त्यो माग जायज छ,” उनले भने ।

कर्मचारीका मागमा बैठकमा सहभागी सबैजना सहमत भएको भन्दै उनले संसद् बैठक सञ्चालन गर्न सरकारले आर्थिक व्यवस्था गर्नुपर्नेमा जोड दिए ।

“कर्मचारीले माग उचित छ, सम्बोधन गर्नुपर्छ । सदन सञ्चालन गर्न आवश्यक रकम सरकारले उपलब्ध गराउनुपर्छ । सदनले पनि मितव्ययी खर्च गर्नुपर्छ,” उनले भने ।