काठमाडौं । काठमाडौंमा आइतबार (आज) तापक्रम केही घटेको छ । शनिबार (हिजो)को तुलनामा तापक्रम घटेको जल तथा मौसम विज्ञान विभाग, मौसम पूर्वानुमान महाशाखाले जानकारी गराएको छ ।

महाशाखाका अनुसार, यस दिन काठमाडौंको अधिकतम तापक्रम ३३.९ डिग्री सेल्सियस मापन गरिएको छ । शनिबार काठमाडौंको अधिकतम तापक्रम वर्षकै बढी ३५.३ डिग्री सेल्सियस थियो ।

विभागका अनुसार, सन् १९९९ अप्रिल २६ मा काठमाडौंको अधिकतम तापक्रम ३५.६ डिग्री सेल्सियस थियो । त्यसयताको उच्च तापक्रम शनिबार मापन गरिएको हो ।

सन् १९९४ मे ४ मा काठमाडौंको अधिकतम तापक्रम ३५.२ डिग्री सेल्सियस थियो । शनिबार त्योभन्दा बढी तापक्रम गरिएको महाशाखाले जनाएको छ । २०१५ जुन ६ मा काठमाडौंको अधिकतम तापक्रम ३५ डिग्री सेल्सियस थियो ।

• ५५ वर्षको तथ्यांक– काठमाडौंमा कुन वर्ष कति गर्मी थियो ? 
• मौसमविद्लाई प्रश्न– मनसुन फैलिन किन ढिलाइ ? काठमाडौंमा कहिले ?

काठमाडौंको हालसम्मकै उच्च तापक्रम भने ३६.६ डिग्री सेल्सियस हो । सन् १९८९ मे ७ मा काठमाडौंको अधिकतम तापक्रम ३६.६ डिग्री सेल्सियस मापन गरिएको थियो । त्यसयता उक्त ‘रेकर्ड ब्रेक’ नभएको महाशाखाले जनाएको छ ।

गएको जेठ २८, १७ र जेठ ११ गते काठमाडौंको अधिकतम तापक्रम समान ३४.४ डिग्री सेल्सियस मापन गरिएको थियो ।

तराईमा उस्तै
तराईका कतिपय स्थानमा आइतबार पनि अधिकतम तापक्रम ४० डिग्री सेल्सियसभन्दा बढी मापन गरिएको छ ।

• पश्चिम तराईमा अझै चार दिन तातो लहरको चेतावनी

महाशाखाले आइतबार बेलुका सार्वजनिक गरेको २० स्थानको विवरणमध्ये यस दिन नेपालगन्जको अधिकतम तापक्रम सबैभन्दा बढी ४३.८ डिग्री सेल्सियस मापन गरिएको छ । शनिबार (हिजो) नेपालगन्जको अधिकतम तापक्रम ४२.६ डिग्री सेल्सियस थियो ।

आइतबार धनगढीको अधिकतम तापक्रम ४२.८, वीरेन्द्रनगरको ४१.४, दिपायलको ४१.२, घोराहीको ३८.६, भैरहवाको अधिकतम तापक्रम ३८.२ डिग्री सेल्सियस मापन गरिएको छ ।

महाशाखाका अनुसार, शनिबार धनगढीको अधिकतम तापक्रम ४२.७, वीरेन्द्रनगरको ४०.६, दिपायलको ४२.०, घोराहीको ३८.१, भैरहवाको अधिकतम तापक्रम ३९.३ डिग्री सेल्सियस थियो ।

महाशाखाका अनुसार, नेपालमा हालसम्मकै उच्च तापक्रम सन् १९९५ मा मापन गरिएको थियो । १९९५ जुन ५ मा धनगढीको अधिकतम तापक्रम ४६.४ डिग्री सेल्सियस मापन गरिएको थियो ।

हाल देशको पूर्वी भूभागमा मनसुन प्रणालीको प्रभाव छ । बाँकी भू–भागमा स्थानीय वायु र भारतको विहार आसपास रहेको न्यूनचापीय क्षेत्रको आंशिक प्रभाव रहेको महाशाखाले जनाएको छ ।

महाशाखाले आइतबार बेलुका सार्वजनिक गरेको तापक्रमको विवरण हेर्नोस्–