ढुंगा हुन सकिनँ !
म ढुंगा हुन सकिनँ 
ढुंगा भएरै देउता हुन पाउनु
ढुंगा भएरै कठोर हुन पाउनु
ढुंगा भएरै अजम्बरी हुन पाउनु
लाग्छ,
ढुंगाको पनि आफ्नै सुन्दरता छ 
ढुंगाबाट के हुन सक्दैन ?
ढुंगा हिमाल हुनसक्छ 
ढुंगा कृति हुनसक्छ
नदीको बगर,
बिसौनी चौतारी हुनसक्छ

म ढुंगा हुन सकिनँ 
तैपनि ऊ भन्छे– हजुरको मन त ढुंगाकै रहेछ !

पशु
पशुहरू पशु भएकै कारण 
मानिसहरूभन्दा कैयौँ हिसाबले उत्कृष्ट हुन सके
पशुहरूले कहिल्यै एउटा शब्दको धेरै अर्थ लगाएनन्
पशुहरूले सिकार गर्नकै लागि कसैलाई साथी बनाएनन्
छलकपट गरेर केही गरेनन् 
जे गरे त्यो पशुको स्वभावका कारण गरे
मानिसले जस्तो 
कसैलाई दास बनाएनन्, भेदभाव गरेनन् 
यौनका लागि प्रेम गरेनन् 
उनीहरूले प्रेम गरेजस्तो ढोँग पनि कहिल्यै गरेनन्
उनीहरू एकअर्कासँग लडे, भिडे
तर, लडेको नाटक गरेनन् 
मिलेको नाटक गरेनन् 
हाँसेजस्तो गरेनन्, रोएजस्तो गरेनन् 
भगवान् बनेनन्, भगवान् बनाएनन्

पशुहरू पशु भएकै कारण 
मानिसहरूभन्दा कैयौँ हिसाबले उत्कृष्ट हुन सके !