पोखरा । आफू नेपाल समाजवादी पार्टी (नेसपा)को एक्लो सांसद बताउँदै आएका फणिन्द्र देवकोटा माओवादी केन्द्रको कारबाहीपश्चात शुक्रबार निलम्बित भए । यसको विरुद्ध आफू कानुनी उपचारमा जाने उनले बताइरहेका छन् । माओवादी केन्द्रको पछि नहिँडेका कारण आफूलाई कारबाही गरिएको दाबी उनले गरेका छन् ।

उनीमाथि पाँच दिनअघि माओवादीले विश्वासको मतको विपक्षमा मतदान गर्ने ह्विप उल्लंघन गरेको आरोप छ । तर, त्यतिञ्जेलसम्म प्रदेशसभा सचिवालयको वेबसाइटमा उनलाई नेपाल समाजवादी पार्टी (नेसपा)को सांसद भनेर उल्लेख गरिएको थियो । उनको परिचयपत्रमा पनि दलको नाम नेसपा नै उल्लेख गरिएको छ ।

शुक्रबारको पत्रकार सम्मेलनमा देवकोटाले आफूलाई प्रदेशसभा सचिवालयले पनि नेसपाको सांसद उल्लेख गरेको जनाएका थिए ।प्रदेशसभा सचिवालयको वेबसाइटले चाहिँ शुक्रबार उनलाई माओवादी केन्द्र संसदीय दलको सदस्य भनेर राखिसकेको थियो । यसबारेमा स्वयं देवकोटा नै अनविज्ञ थिए ।

आखिर किन ‘फ्लोर क्रस’ गरेको दुई दिनमै सचिवालयले उनलाई माओवादीको सांसद सूचीमा सूचीकृत गर्‍यो त ? के यसमा राजनीतिक घटनाक्रम जोडिन्छ ?

प्रदेशसभा सचिवालयका सचिव हरिराज पोखरेलले यी प्रश्नलाई इन्कार गरे । उनले तीन दिनअघिमात्रै वेबसाइट अपडेट र व्यवस्थित बनाइएको दाबी गरे । तर, कुनै बेला नेसपाको सांसद भनेर उल्लेख गरिएका फणिन्द्रलाई माओवादी केन्द्र संसदीय दलको सदस्यमा किन राखियो त ?

सचिव पोखरेल भन्छन्, “संसदीय दल उहाँको माओवादी केन्द्र हो, उहाँको पार्टी चाहिँ नेसपा नै हो ।”

देवकोटालाई संसदीय दलको हिसाबले मात्र माओवादीको सांसद सूचीमा राखिएको उनले बताए । “फ्लोर क्रस योसँग सम्बन्धित छैन । अहिले हामीले यूएनडीपीले सहयोग गरेका कारणले बल्ल नयाँ वेबसाइट बनाएका छौँ । अस्ति हो, हामीले यूएनडीपीलाई जिम्मा दिएका थियौँ, अहिले हामीले धेरै कुरा राखेका छौँ । उहाँको संसदीय दल नेकपा माओवादी नै हो, राजनीतिक दल चाहिँ नेसपा हो, त्यही विवरण अपडेट गरिएको हो ।” उनले भने ।