काठमाडौं । नेपालको विभागीय टोली सशस्त्र प्रहरी बलको एपीएफ क्लबले एसियाली फुटबल महासंघ (एएफसी)को आयोजनामा हुने एएफसी महिला च्याम्पियन्स लिगको प्रारम्भिक चरणमा प्रतिस्पर्धा गर्ने भएको छ ।

गत अगस्टमा घोषणा भएअनुसार एएफसीले महिला च्याम्पियन्स लिगका लागि २२ देशले इच्छा देखाएको जनाएको छ । अक्टोबर ६ देखि १२ सम्म केन्द्रीकृत संरचनामा हुने समूह चरणमा कुल १२ टिमले प्रतिस्पर्धा गर्नेछन् । जसमा फिफा महिला वरीयताको शीर्ष–८ मा रहेका टिम सोझै छनोट हुनेछन् ।

यस्तै, बाँकी चार टिम भने प्रारम्भिक चरणमा प्रतिस्पर्धा गर्ने १४ टिमबाट चयन हुने एएफसीले जनाएको छ । एएफसीका अनुसार प्रारम्भिक चरणमा सहभागी १४ टिममा नेपालको एपीएफले पनि प्रतिस्पर्धा गर्नेछ । 

प्रारम्भिक चरणका १४ टिमलाई चार समूहमा विभाजित गरिनेछ । जसमा चार टिम रहने गरी दुई समूह र तीन टिम रहने गरी दुई समूह हुनेछ । जसबाट प्रत्येक समूहका विजेता महिला च्याम्पियन्स लिगका लागि छनोट हुनेछन् । प्रारम्भिक चरणका खेलहरू अगस्ट २५ देखि ३१ सम्म हुनेछन् ।

एएफसीका अनुसार जोर्डन, मलेसिया, साउदी अरेबिया र थाइल्यान्डले प्रारम्भिक चरणका समान एक समूहका खेलहरू आयोजना गर्नेछन् । यस्तै, चीन र भियतनामले प्रतियोगिताको समूह चरणका समान एक समूहका खेलहरू आयोजना गर्नेछन् । समूह चरणमा तेस्रो समूहको खेलहरू आयोजना गर्ने देश भने तय हुन बाँकी नै रहेको एएफसीले जनाएको छ ।