काठमाडौं । समूह चरणको तेस्रो खेलमा पपुवा न्युगिनी (पीएनजी)विरुद्ध सात विकेटको सहज जित निकाल्दै अफगानिस्तान आईसीसी ट्वान्टी–२० विश्वकपको सुपर–८ मा प्रवेश गरेको छ ।

बिहीबार टारोउबामा भएको खेलमा पीएनजीले प्रस्तुत गरेको ९६ रनको लक्ष्य अफगानिस्तानले १५.१ ओभरमा तीन विकेट गुमाएर पूरा गर्‍याे । 

अफगानिस्तानको जितमा गुलबदिन नैबले ४९ रन बनाए । उनले ३६ बलमा चार चौका र दुई छक्का प्रहार गरे । मोहम्मद नाबीले १६, अज्मतुल्लाह ओमरजाईले १३ र रहमनुल्लाह गुर्बजले ११ रन थपे ।

पीएनजीका एलेइ नाओ, सेमो कामेअ र नोर्मन भानुवाले समान एक विकेट लिए ।

त्यसअघि टस हारेर ब्याटिङमा आएको पीएनजीले १९.५ ओभरमा सबै विकेट गुमाएर ९५ रनको योगफल खडा गरेको थियो । पीएनजीका किप्लिन डोरिगाले २७ रन बनाए । एलेइ नाओले १३ र टोनी उराले ११ रन थपे । यसबाहेक, अन्य ब्याटरले दोहोरो अंकमा रन जोड्न सकेनन् । पीएनजीका लेगा सिएगा र सेसे बाउ गोल्डेन डक भएका थिए ।

जितसँगै तीन खेलबाट ६ अंक जोडेको अफगानिस्तान समूह ‘सी’ बाट अन्तिम खेलअगावै सुपर–८ मा प्रवेश गरेको हो । अफगानिस्तानको यो जितसँगै समूह ‘सी’ बाट सुपर–८ मा पुग्ने दुई टिमको टुंगो लागेको छ । यो समूहबाट अफगानिस्तानसँगै वेस्ट इन्डिजले पनि सुपर–८ मा स्थान सुनिश्चित गरेको हो । यस्तै, समूहका न्युजिल्यान्ड, युगान्डा र पीएनजी भने सुपर–८ को दौडबाट बाहिरिएका छन् ।

बिहीबार राति भएको अर्को खेलमा इंग्ल्यान्डले ओमानविरुद्ध आठ विकेटको सहज जित निकाल्यो । नर्थ साउन्डमा भएको खेलमा ओमानले प्रस्तुत गरेको ४८ रनको लक्ष्य इंग्ल्यान्डले ३.१ ओभरमा दुई विकेट गुमाएर भेट्टाएको हो । 

इंग्ल्यान्डको जितमा कप्तान जस बटलरले अविजित २४ रन बनाए । फिल साल्टले १२ रन थप्दा विल ज्याक्सले पाँच र जोनी बेरेस्टोले आठ रन जोडे ।

प्रतियोगिताको समूह ‘बी’ मा रहेको इंग्ल्यान्डको यो पहिलो जित हो । तीन खेलबाट तीन अंक जोडेको इंग्ल्यान्ड समूहको तेस्रो स्थानमा छ । प्रतियोगितामा समूह चरणको सबै खेल खेलिसकेको ओमान भने जितविहीन प्रतियोगिताबाट बाहिरिएको छ ।