विराटनगर । कोसी प्रदेश सरकार गठनविरुद्ध निवर्तमान मुख्यमन्त्री केदार कार्कीले सर्वोच्च अदालतमा दायर गरेको रिटमाथि आइतबारबाट पूर्ण इजलासमा सुनुवाइ हुँदै छ । न्यायाधीशहरू प्रकाशकुमार ढुंगाना, अव्दुल अजीज मुसलमान र सुनिलकुमार पोखरेलको पूर्ण इजलासमा रिटको सुनुवाइ हुने भएको हो । 

एउटा मुख्यमन्त्रीलाई पदमुक्त नगरी संविधानविपरीत अर्को मुख्यमन्त्री नियुक्त गरेकाले सरकार गठन प्रक्रिया बदर हुनुपर्ने मागसहित कार्कीले गएको वैशाख २८ गते रिट दायर गरेका थिए  ।

रिटमा अन्तरिम आदेश माग गरिएको थियो । तर, अदालतले अन्तरिम आदेश भने दिएन । नेपालको संविधानको धारा १६८ को उपधारा ५ अनुसार मुख्यमन्त्री नियुक्त भएका कार्कीलाई समर्थन गर्ने सांसदहरूले संकल्प प्रस्ताव पारित गरी ३० दिनभित्र विश्वासको मत लिन निर्देशन दिएका थिए । 

सो अवधिमा विश्वासको मत नलिएको भन्दै प्रदेश प्रमुख पर्शुराम खापुङले एमालेका हिक्मत कार्कीलाई सोही धारा अनुसार वैसाख २७ गते मुख्यमन्त्री नियुक्त गरेका थिए । 

कोसी सरकार गठनविरुद्ध परेको रिटमाथि गत बुधबार न्यायाधीशद्वय तिलप्रसाद श्रेष्ठ र बालकृष्ण ढकालको संयुक्त इजलासले रिटलाई पूर्ण इजलासमा पठाउने आदेश दिएको थियो ।

प्रदेशसभाका ५२ सांसदको समर्थनमा मुख्यमन्त्री भएका एमालेका प्रदेशसभा सदस्य हिक्मतकुमार कार्कीले प्रदेशसभाबाट विश्वासको मतसमेत लिइसकेका छन् ।

निवर्तमान मुख्यमन्त्री कार्कीले भने उपधारा ५ अनुसार एक पटक विश्वासको मत लिएपछि दुई वर्षसम्म आफूले विश्वासको मत लिन नपर्ने भन्दै नयाँ सरकार गठनको प्रक्रिया खारेज गर्न र आफूलाई नै मुख्यमन्त्रीमा निरन्तरता दिन माग गरेका छन् ।