काठमाडौं । आईसीसी ट्वान्टी–२० विश्वकपमा वेस्ट इन्डिजले युगान्डाविरुद्ध पहिले ब्याटिङ गर्ने भएको छ ।

आइतबार गुयनास्थित प्रोभिडेन्स रंगशालामा हुने खेलका लागि भएको टस जितेर वेस्ट इन्डिजका कप्तान रोभमन पावेलले ब्याटिङको निर्णय गर्दै युगान्डालाई फिल्डिङको निम्तो दिएका हुन् ।

प्रतियोगितामा वेस्ट इन्डिजको यो दोस्रो खेल हो । समूह ‘सी’ मा रहेको वेस्ट इन्डिजले यसअघि पहिलो खेलमा पपुवा न्यु गिनी (पीएनजी) विरुद्ध पाँच विकेटको जित निकालेको थियो ।

युगान्डाको भने यो समूह चरणको तेस्रो खेल हो । जारी विश्वकपमा जितविहीन युगान्डाले यसअघि पहिलो खेलमा अफगानिस्तानविरुद्ध १२५ रनको हार बेहोर्दा दोस्रो खेलमा भने पीएनजीविरुद्ध तीन विकेटको जित निकालेको थियो ।

एक खेलबाट दुई अंक जोडेको वेस्ट इन्डिज समूह ‘सी’ को दोस्रो स्थानमा छ । दुई खेलबाट दुई अंक जोडेको युगान्डा तालिकाको तेस्रो स्थानमा छ ।

विश्वकपमा युगान्डाको यो पहिलो सहभागिता हो । यता, वेस्ट इन्डिजले भने सन् २०१२ र २०१६ को गरी दुई पटक विश्वकपको उपाधि जितिसकेको छ ।