काठमाडौं । सञ्चार तथा सूचना प्रविधिमन्त्री रेखा शर्मा मुलुक वैदेशिक ऋणको भरमा चलिरहेको स्वीकार गरेकी छन् । शनिबार काठमाडौंमा आयोजित सामाजिक अभियन्ताको राष्ट्रिय भेलामा उनले यस्तो बताएकी हुन् ।

राष्ट्र र जनताको हितमा हुने गरी मात्र वैदेशिक सहायता भित्र्याउन उनले सामाजिक संघ–संस्थालाई सचेत पनि गराइन् । “सरकार वैदेशिक अनुदानमा, वैदेशिक ऋणमा चलिराखेको छ । सरकारको निकाय हो, समाज कल्याण परिषद् । त्यसले विभिन्न खालको आईएनजीओबाट पैसा लिइरहेको छ भने हामीले हाम्रो राष्ट्र र जनताको हितविपरीत हुने गरेर ऋण लिनु हुँदैन,” उनले भनिन् ।

सरकारले मुलुकको समृद्धिका निम्ति कृषि, ऊर्जा र सूचना प्रविधिको क्षेत्रलाई प्राथमिकता दिएको उनले उल्लेख गरिन् ।

उत्पादन वृद्धिमा जोड दिएर सरकारले बजेट ल्याएको उनले जिकिर गरिन् । उनले उत्पादन वृद्धि हुने गरी सहायता रकम परिचालन गर्न पनि सामाजिक संघ–संस्थालाई निर्देशन दिइन् । न्युज एजेन्सी नेपाल