काठमाडौं । नेकपा (एमाले) का महासचिव शंकर पोखरेलले अहिलेको सत्ता समीकरण आगामी निर्वाचनसम्म नै अघि बढ्ने बताएका छन् ।

एमालेको उपभोक्ता हित संरक्षण तथा सुशासन केन्द्रीय विभागले बिहीबार काठमाडौंमा आयोजना गरेको कार्यक्रममा महासचिव पोखरेलले अहिलको समीकरणको मुख्य साझेदार एमाले भएकाले समीकरणलाई मिसन–८४ सम्मलाई निरन्तरता दिन चाहेको बताए ।

सरकारले जनताको अपेक्षाअनुसार मुलुकको संकटलाई समाधान गर्ने हिसाबले प्रभावकारी बनाउन सुझाव दिने गरेको भन्दै उनले यसलाई विरोधका रूपमा बुझ्न नहुने बताए । बजेटका विषयमा सत्ता साझेदार दलसँग छलफल भएको भए अझै राम्रो बनाउन सकिने एमालेको धारणा रहेको भन्दै उनले यसलाई सुझावका रूपमा लिनुपर्ने बताए ।

महासचिव पोखरेलले बजेटका बारेमा पार्टीका नेताहरूबाट जेजस्ता धारणा आए पनि आफूहरू बजेटको विपक्षमा नजाने बताए ।

उनले बजेटमार्फत राजस्वको लक्ष्य र आकारमा सन्तुलन नमिल्दा बाह्य तथा आन्तरिक ऋण लिनुपर्ने अवस्था देखिएको र यसको असर प्रत्यक्ष उपभोक्तामा पर्ने बताए ।