काठमाडौं । नेपाली कांग्रेसका सांसद राजेन्द्र केसीले गिरिबन्धु टी स्टेट प्रकरणमा छानबिन आयोग गठन गर्नुपर्ने माग गरेका छन् ।

बिहीबार संसद् भवनबाहिर सञ्चारकर्मीहरूसँग कुरा गर्दै उनले गिरिबन्धु टी स्टेट प्रकरणमा छानबिन आयोग बन्नुपर्ने कांग्रेसको चाहना रहेको बताए । उनले गिरिबन्धु टी स्टेटबारे सबै कुरा बाहिर आउनुपर्ने बताए ।

"गिरिबन्धु टी स्टेटमा ३४४ रोपनी जग्गामा जुन किसिमले त्यसको कुरा आयो । त्यसको सत्यता बाहिर आउनुपर्छ भन्नेमा नेपाली कांग्रेस स्पष्ट छ । नेकपा (एमाले)का अध्यक्ष केपी शर्मा ओलीले ५१ बिगाह र १९ बिगाह कांग्रेसले नै बेचेको हो भन्नुभएको छ । त्यो सम्बन्धमा क्लियर हुनुपर्छ । यसमा छानबिन आयोग बन्नुपर्छ भन्ने नेपाली कांग्रेसको चाहना छ," केसीले भने ।