काठमाडौं । भारतले नेपालको सुनसरीको रामधुनी नगरपालिकास्थित भादगाउँ सिनुवारी माध्यमिक विद्यालयको भवन निर्माण गरिदिएको छ । ‘नेपाल–भारत विकास सहकार्य’अन्तर्गत भारत सरकारको दुई करोड ६३ लाख रुपैयाँ आर्थिक सहयोगमा विद्यालयको भवन निर्माण गरिएको नेपालस्थित भारतीय दूतावासले जनाएको छ ।

भवनको जिल्ला समन्वय समितिका प्रमुख राजन मेहता, रामधुनी नगरपालिकाका मेयर शंकरलाल चौधरी र काठमाडौंस्थित भारतीय राजदूतावासका प्रथम सचिव सुमन शेखरले संयुक्तरूपमा उद्घाटन गरे ।

त्यस्तै, ‘नेपाल–भारत विकास सहकार्य’अन्तर्गत भारत सरकारको तीन करोड पाँच लाख रुपैयाँ आर्थिक सहयोगमा निर्माण गरिएको सुनसरीकै इनरुवा नगरपालिकास्थित भगवती माध्यमिक विद्यालयको विद्यालय भवनको पनि उद्घाटन गरिएको छ । 

भवनको जिल्ला समन्वय समितिका प्रमुख मेहता, इनरुवा नगरपालिकाका मेयर केदार भण्डारी र काठमाडौंस्थित भारतीय राजदूतावासका प्रथम सचिव शेखरले संयुक्तरूपमा उद्घाटन गरे ।

दूतावासका अनुसार सन् २००३ यता नेपालका विभिन्न क्षेत्रमा ५५१ वटाभन्दा बढी उच्च प्रभाव सामुदायिक विकास परियोजना अघि बढाइएका छन् र ४९० वटा परियोजना सम्पन्न भइसकेका छन् ।