काठमाडौं । विकास, आर्थिक मामिला तथा सुशासन समितिका सभापति कमला पन्तले विपद् व्यवस्थापनमा राज्य संवेदनशील हुन नसकेको बताएकी छन् । आइतबार काठमाडौंमा आयोजित कार्यक्रममा उनले सरकारमा विपद् व्यवस्थापन गर्ने प्रतिबद्धता हुनुपर्ने बताइन् । उनले विपद् व्यवस्थापन गर्ने प्रतिबद्धता सरकारमा हुने हो भने हेलम्बु, मेलम्चीलगायत विपद् जोखिम स्थानका बासिन्दाहरूले दुःख भोग्नु नपर्ने बताइन् । 

हेलम्बु र मेलम्चीमा अझै पनि जोखिम भएको भए बस्ती स्थानान्तरण गर्न आवश्यक रहेको बताउँदै उनले दिगो विकासको लक्ष्य पूरा गर्नेगरी अघि बढ्न जोड दिइन् । विज्ञहरूले समस्या केलाउने मात्र नभइ समाधानका उपायहरू पनि दिनुपर्ने उनको भनाइ छ । 

“विपद् व्यवस्थापनमा राज्यले खासै संवेदनशीलता देखाएको छैन । पटक–पटक कुरा उठाएका छौँ । विपद् व्यवस्थापन गर्ने प्रतिबद्धता सरकारमा भएको भए यो हेलम्बु र मेलम्ची आसपासका व्यक्तिहरुले यति दुःख भोग्नुपर्दैन थियो । त्यहाँ समस्या छ भनेपछि बस्ती अर्को ठाउँमा लगेर व्यवस्थित गर्ने कि सधैँ आतंकित बनाउने ? जनतालाई त्यसको बारेमा छलफल हुनुपर्छ नि । मेलम्चीको जुन समस्या छ, मलाई पनि के लाग्छ भने यो जलवायु परिवर्तनको असर हो वा दिगो विकासको लक्ष्य पूरा नगर्ने हो । हामीले दिगो विकासतिर लागेका छैनौँ । विज्ञहरूले पनि यसरी समस्या मात्रै नभइ समाधान पनि देखाइदिनुपर्छ,” उनले भनिन् । 

सभापति पन्तले जलवायु परिवर्तनकै कारण मेलम्चीमा बाढी गएको हो भन्ने कुरामा सबैको एकमत हुन सके नेपालले जलवायु परिवर्तनसम्बन्धी वित्त कोषबाट मेलम्चीका लागि पनि केही सहायता प्राप्त गर्ने बताइन् ।