काठमाडौं । निर्देशक घनश्याम लामिछानेले मौलिक कथापछि आफूले नेपाली डायस्पोराको कथा देखाउन लागेको बताएका छन् । विदेशमा रहेका नेपालीको कथा हाम्रो आफ्नै कथा भएको उनको भनाइ छ । 

“विदेशमा रहेका नेपालीको कथा पनि हाम्रो आफ्नै कथा हो । हामी नेपालमा रहेका नेपालीको कथा भनिरहेका छौँ । तर विदेशमा रहेका नेपालीको कथा भनेका छैनौँ,” घनश्याम भन्छन्, “त्यसैले हामी नेपालीले नै भोगेको र सिनेमा मेकरले नजरअन्दाज गरिरहेको कथा चलचित्र लन्डन टु पेरिसमार्फत भन्ने प्रयास गरेका छौँ ।” 

आफ्ना अघिल्ला सिनेमा ‘धौली’, ‘पञ्चेबाजा’ र ‘चित्रा’ नेपाली परिवेशमा छायांकन गरेका उनले ‘लन्डन टु पेरिस’ भने बेलायतको लन्डनमा छायांकन गरेका छन् । नेपाली डायस्पोराको कथा भएकाले यो चलचित्र लन्डनमा छायांकन गरिएको छ । 

चलचित्र हेरिरहँदा दर्शकले कथाबाहिर गएजस्तो अनुभूत नगर्ने निर्देशक लामिछानेको दाबी छ । चलचित्रका पात्रसँग दर्शकले आफूलाई मजाले रिलेट गर्ने उनको विश्वास छ । 

चलचित्रमा साम्राज्ञी राज्यलक्ष्मी शाह, निश्चल खड्का, कविर खड्का, गरिमा शर्मा, रुष्मा थापा, मनिष श्रेष्ठ, मनिष गान्धी र लोक विक्रम मल्लको मुख्य भूमिका छ । 

ट्राभल लभस्टोरीको कथा, पटकथा र संवाद प्रदीप भारद्धाजले लेखेका छन् । चलचित्र ‘लन्डन टु पेरिस’ जेठ २५ गतेबाट प्रदर्शनमा आउँदै छ ।