काठमाडौं । नेपाल उद्योग वाणिज्य महासंघका अध्यक्ष चन्द्रप्रसाद ढकालले बेलायती लगानीकर्तालाई लगानीका निम्ति आग्रह गरेका छन् ।

नेपालका निम्ति बेलायती राजदूत रोब फेनसँग गएको शुक्रबार भएको भेटमा उनले नेपालमा वैदेशिक लगानीको सम्भावनाबारे जानकारी गराएका थिए । सरकारले नेपालमा लगानी आकर्षित गर्न आयोजना गरेको नेपाल लगानी सम्मेलनबारे पनि उनले उल्लेख गरे ।

उनले नेपाल र बेलायतबीच लामो समयदेखि द्विपक्षीय सम्बन्ध रहेको स्मरण गरे । बेलायती राजदूतलाई दुई देशबीचको व्यापार र लगानीलाई थप प्रवर्द्धन गर्न उनले आग्रह गरे ।

निजी क्षेत्रले कुल गार्हस्थ उत्पादनमा ८१ र रोजगारीमा ८७ प्रतिशत योगदान पुर्‍याइरहेको अवस्थाबारे पनि उनले राजदूतलाई जानकारी गराए । नेपालमा वैदेशिक लगानी भित्रिएमा निजी क्षेत्रले थप योगदान दिन सक्ने ढकालले बताए ।

उनले मुलुकमा व्यवसाय गर्न सहज वातावरण भएको पनि बताए । महासंघको सल्लाहमा सरकारले लगानी प्रक्रियालाई सहज बनाउन आठ लगानी ऐन परिमार्जन गरेको उनले राजदूत फेनलाई जानकारी गराए ।

ढकालले राजदूत फेनलाई नेपालमा लगानीका विभिन्न अवसरका बारेमा अवगत गराए । उनले जलविद्युत्, सूचना प्रविधि, पूर्वाधार र पर्यटन क्षेत्रमा लगानीको प्रशस्त सम्भावना रहेको बताए । “नेपालको अधिकांश आर्थिक क्षेत्र पूर्ण रूपमा प्रयोग हुन सकेको छैन । त्यसैले लगानीकर्ताले छनोट गर्नुपर्ने धेरै क्षेत्रहरू छन्,” ढकालले भने ।

भेटवार्ताका क्रममा महासंघका उपाध्यक्ष हेमराज ढकालले व्यापार विस्तारका बारेमा आफ्नो धारणा राखेका थिए ।

यस्तै, संघका लगानी फोरमका सभापति मनोज पौडेलले नयाँ लगानीका अवसरबारे जानकारी गराएका थिए ।

त्यसक्रममा राजदूत फेनले द्विपक्षीय लगानी सम्झौताको खाका तयार पार्न पहल गरेकामा महासंघप्रति धन्यवाद ज्ञापन गरे । उनले दोहोरो करमुक्ति सम्झौताबारे पनि चासो राखेका थिए ।

महासंघका महानिर्देशक गोकर्णराज अवस्थीले बेलायत सरकारले ६५ विकासोन्मुख देशलाई विकासोन्मुख राष्ट्र व्यापार योजना सुविधा उपलब्ध गराएको चर्चा गरे । नेपालले यो सुविधा कसरी लिन सक्छ भन्ने जानकारीका लागि उनले राजदूत फेनलाई अनुरोध गरे ।

सन् २०२६ सम्ममा नेपाल विकासोन्मुख मुलुकमा स्तरोन्नति हुने भएकाले निर्यातमा डिउटी फ्री सुविधा गुमाउने अवस्थीले बताए । त्यसैले विकासोन्मुख राष्ट्र व्यापार योजना नेपालका निम्ति महत्त्वपूर्ण हुने उनले उल्लेख गरे ।