काठमाडौं । नेकपा (एकीकृत समाजवादी)का सांसद मेटमणि चौधरीले पानीजहाज अफिस बन्द गर्न आग्रह गरेका छन् । आइतबारको प्रतिनिधिसभा बैठक आगामी वर्षको बजेटमाथिको सैद्धानिक छलफलमा बोल्दै सांसद चौधरीले पानीजहाज कार्यालयको काम नभएको बताएका हुन् ।

“पानीजहाज कार्यालय उहिलेदेखि हामीले चलाइराखेका छौँ,” उनले भने, “अहिले पनि कर्मचारी पालिरहेका छौँ । तर, पानीजहाज अफिसले हामीलाई के दियो ? खासमा हामीले पानीजहाजबाट उपलब्धि हासिल गर्न सक्दैनाैँ भने अफिस विस्थापित गरिदिऊँ ।”

अहिले पनि २० करोड रूपैयाँ छुट्याएको भन्दै यो अनुत्पादक क्षेत्रमा बजेट छुट्याउन उपयुक्त नहुने उनको भनाइ छ । “त्यसमा रेगुलर जाने अपरेसन खर्च कटौती गरौँ । यसो गर्न सकियो भने हामीले उपलब्धिपूर्ण प्रोजेक्टमा बजेट हाल्न सक्छौँ,” सांसद चौधरीले भने ।

रेल ल्याएको धेरै वर्ष भइसकेको र प्रोजेक्टमा पैसा छुट्याइने गरेको पनि उनले बताए । अहिले त्यो रेल नचलाएर बेहुलीजस्तो घुम्टो ओढाएर राखिएकोमा पनि उनले आपत्ति जनाए । यस्ता प्रोजेक्ट कमिसन खानलाई मात्र बनाइने गरिएको उनको भनाइ छ ।