काठमाडौं । आईसीसी ट्वान्टी–२० विश्वकपका निम्ति हाल अमेरिकामा रहेको नेपाली राष्ट्रिय क्रिकेट टिमको अफिसियलबाट नेपाल क्रिकेट संघ (क्यान)का अध्यक्ष चतुरबहादुर चन्दको नाम हटाइएको छ ।

विश्वकपका लागि घोषित १५ सदस्यीय खेलाडीसँगै १० अफिसियलको नाममा अध्यक्ष चन्दको पनि नाम रहेपछि क्यानको आलोचना गरिएको थियो । नेपाली टिम अमेरिका पुग्दा चन्द अफिसियलमा रहे पनि टिममा अनिवार्य रहेको चिकित्सक थिएनन् । डाक्टर नहुँदा आलोचना खेपेपछि चन्दले टिम चिकित्सक अफिसियलमा समेटेका हुन् । क्यानले अमेरिकामै डा. होमनाथ पन्तलाई टिम अफिसियलमा समेटेको हो ।

क्यानका अध्यक्ष चन्दको नाम अफिसियलबाट हटाइएपछि विश्वकपका निम्ति उनी अमेरिका र वेस्ट इन्डिजमा रहँदाको खर्च कसले व्यहोर्छ भन्ने दुविधा छ । क्यानका केन्द्रीय कार्यसमिति सदस्य दुर्गानाथ पाठकले अध्यक्ष अफिसियलमा रहनु नेपाली क्रिकेटकै लागि लज्जाको विषय भएको बताए । अध्यक्षको नाम अफिसियलबाट हटाइएपछि उनको खर्च कसले व्यहोर्ने भन्ने विषयमा कार्यसमितिमा कुनै जानकारी नआएको पाठकको भनाइ छ ।

“क्यानको अध्यक्षजस्तो मान्छे टिमको अफिसियल बनेर विश्वकपका निम्ति जानु नेपाली क्रिकेटकै लागि लज्जाको विषय हो,” पाठकले बाह्रखरीसँग भने, “अहिले अध्यक्षज्यू आफैँले आफू टिमको अफिसियलबाट बाहिरिएको बताउनुभएको छ । अब अध्यक्षज्यू त्यहाँ रहँदाको खर्च कसले व्यहोर्छ भन्ने विषयमा कार्यसमितिलाई कुनै जानकारी गराइएको छैन ।”