काठमाडौं । आईसीसी ट्वान्टी–२० विश्वकपको उद्घाटन खेलमा अमेरिकाले क्यानडामाथि सहज जित नकालेको छ । अमेरिकाको टेक्सासस्थित ड्यालसमा भएको खेलमा अमेरिकाले सात विकेटको जित निकालेको हो ।

टस हारेर सुरुमा ब्याटिङको निम्तो पाएको क्यानडाले निर्धारित २० ओभरमा पाँच विकेट गुमाएर १९४ रन बनाएको थियो ।

जितका लागि १९५ रनको लक्ष्य पाएको अमेरिकाले १७.४ ओभरमा १९७ रन बनायो ।

अमेरिकाको जितमा आरोन जोन्सले विस्फोटक ब्याटिङ गरे । उनले मात्र ४० बलमा ९४ रन बनाए । आन्ड्रिस गोसले ६५ रन बनाउँदा कप्तान मोनांक पटेलले १६, कोरी आन्डर्सनले तीन रन बनाए ।

बलिङतर्फ क्यानडाका कलीम सना, जेरेमी गोर्डन र निखिल दत्तले एक–एक विकेट लिए ।

त्यसअघि क्यानडाका लागि नवनीत धलिवालले सर्वाधिक ६१ रन बनाएका थिए । निकोलश किर्टनले ५१ रन बनाउँदा श्रेयस मोवाले ३२ रन बनाए । आरोन जोनसनले २३ रन, दिलप्रीत बज्वाले ११, पर्गत सिंहले पाँच रन तथा डाइलन हेलिगरले एक रन बनाए ।

अमेरिकाका लागि अलि खान, हरमीत सिंह र कोरे आन्डर्सनले समान एक–एक विकेट लिएका थिए ।

प्रतियोगितामा कुल २० टोलीको सहभागिता छ । जसलाई प्रत्येक समूहमा पाँच टिम रहने गरी चार समूहमा विभाजन गरिएको छ ।

प्रतियोगिताको यस संस्करणमा नेपाल पनि छनोट भएको छ । समूह ‘डी’मा रहेको नेपालसँगै नेदरल्यान्ड्स, श्रीलंका, दक्षिण अफ्रिका र बंगलादेश छन् ।