काठमाडौं । अर्थविद् डा. विश्वनाथ पौडेलले सरकारले ल्याएको बजेटबाट निजी क्षेत्र उत्साहित हुनुपर्ने अवस्था नभएको टिप्पणी गरेका छन् ।

शुक्रबार काठमाडौंमा स्कुल अफ डेमोक्रेसीले आयोजना गरेको मुलुकको आर्थिक अवस्था र बजेट समिक्षा विषय कार्यक्रममा उनले सरकारले निजी क्षेत्रलाई प्रोत्साहन गर्ने गरी सुधारका कुनै पनि नीति नल्याएको दाबी गरे ।

सरकारले ल्याएको नयाँ सुधारको नीतिले नयाँ उद्योग थप्न सक्ने अवस्था नदेखिएको उनको भनाइ छ । उनले सरकारले ल्याएको बजेटमा नयाँ कुराहरू केही नभएको पनि बताए ।

विगतका बजेटमा मन्त्रालयगत नयाँ सुधार योजना स्पष्ट गरिने तर अहिलेको बजेटमा सुधारका योजना नभएको बताए । उनले मुख्य ड्राइभर भनेर हेर्ने भौतिक पूर्वाधार र सहरी विकासमा बजेट बढेको पनि त्यहाँ खल्तीका योजनाहरू आउने गरी बजेट ल्याइएको बताए ।

"सरकारले ल्याएको बजेटमा नयाँ कुराहरू केही छैन । सुधारका कुरामा विगतका बजेटमा मन्त्रालयगत, नयाँ सुधार योजना हुँदा स्पष्ट गरिन्थ्यो । त्यो भएकाले मुख्य ड्राइभर भनेर हेर्ने भौतिक पूर्वाधार र सहरी विकासमा बजेट बढेको छ । त्यहाँ खल्तीका योजनाहरू आउने डर छ । त्यो भयो भने खर्च हुँदैन । कृषि, शिक्षा र स्वास्थ्यको बजेटको प्रतिशत घटेको छ । निजी क्षेत्र बजेटबाट उत्साहित हुनुपर्ने आवश्यकता छैन । कुन नीतिले उद्योग क्षेत्रमा नयाँ उद्योग थप्ने त्यो देखिएको छैन," उनले भने ।