काठमाडौं । अभिनेता धिरज मगर र अभिनेत्री उपासना सिंह ठकुरीको मुख्य भूमिका रहेको चलचित्र ‘खुस्मा’को छायांकन सकिएको छ । ४० दिनमा चलचित्रको छायांकन सकिएको हो । 

पहिलो चरणमा मनाङमा छायांकन गरिएको चलचित्रको दोस्रो चरणको छायांकन पूर्वी रुकुमको विभिन्न स्थानका साथै कास्कीमा गरिएको थियो । 

मगर समुदायको सांस्कृतिक परिवेशमा निर्माण हुन लागेको प्रेमकथामा आधारित चलचित्रले जनयुद्धको प्रभावबीचको प्रेमलाई पर्दामा देखाउनेछ ।

चलचित्रको लेखन तथा निर्देशन अशोक थापा मगर गरेका हुन् । उनको यो पहिलो फिचर फिल्म हो । 

चलचित्रमा धिरज र उपासनासँगै माओत्से गुरुङ, खड्गबहादुर पुन, सुजाता राई, विजय सुब्बा, राज थापा काउचा, अस्तित्व भट्टचन, संगीता थापा मगरलगायत कलाकारको अभिनय रहेको छ ।

चलचित्र असोज ३ गते रिलिज हुनेछ ।