काठमाडौं । नेपाल मजदुर किसान पार्टीका सांसद प्रेम सुवालले प्रतिनिधिसभामा भइरहेको गतिविधिलाई सत्ताको भागबण्डाको झगडा भएको बताएका छन् । सोमबार प्रतिनिधिसभा बैठकपछि सञ्चारकर्मीसँग कुरा गर्दै उनले प्रतिनिधिसभामा भइरहेको गतिविधिहरू पुँजीवादी पार्टीहरूको सत्ताको भागबण्डाको झगडा भएको बताए ।  

विगतमा प्रधानमन्त्री पुष्पकमल दाहाल प्रचण्डलाई सबैले विश्वासको मत दिएकाे भन्दै अहिले केही विषयमा झगडा भएका कारण विश्वासको मत नदिएको उनको  टिप्पणी छ । उनले विश्वासको मतको पक्ष वा विपक्षमा बस्दा साक्षी बसेको जस्तो हुने भएकाले आफूले मत नै नदिएको बताए । दुवै पक्ष ठिक नभएकाले आफू तटस्थ बसेको बताएका सांसद सुवालले प्रमुख प्रतिपक्ष दलले नाराबाजी गर्दा संसद्को कारबाही रोक्नु राम्रो हुने धारणा राखे ।  

“पुँजीवादी पार्टीहरूको सत्ताको भागबण्डाको झगडा हो । देश र जनताको लागि होइन । पुष्पकमल दाहालले पहिलोचोटी विश्वासको मत लिँदा एमाले, कांग्रेस सबै मिलेर दिएकै हो । अहिले के विषयमा झगडा भयो । भोलि कुन दिन मिल्छ ? त्यसैले हामी हिजो पनि मत दिन्नँ । आज पनि मत दिन्नँ । भर नै छैन पुँजिवादी पार्टीहरूको । हुन्न र हुन्छमा गएपछि त साक्षी बसेको जस्तो हुन्छ । दिन्नँ भनेपछि तिमीहरू दुवै ठिक छैनौँ । उमेदवार नै ठिक छैन भनेको हो त्यो । प्रमुख विपक्षीले आवाज उठाइरहँदा संसद्को कारबाही रोकेर जानु राम्रो हो । पहिला पनि यस्तो धेरै भइसकेको भन्ने नजिर भएको हुनाले नेपालमा संसदीय व्यवस्था पुँजीवादी व्यवस्था नै हो । खसीको टाउको देखाएर कुकुरको मासु बेच्ने भनेजस्तो भइरहेको लाग्यो । यसले देश र जनताको लागि हित गर्दैन,” सांसद सुवालले भने ।