काठमाडौं । प्रतिपक्षी नेपाली कांग्रेसले प्रधानमन्त्री पुष्पकमल दाहाल ‘प्रचण्ड’लाई सहकारी बचत रकम अपचलनबारे संसदीय छानबिन समिति बनाएर मात्रै विश्वासको मत लिन सदनमा आउन आग्रह गरेको छ । 

आज बसेको पार्टी संसदीय दलको बैठकको निर्णय सुनाउँदै प्रमुख सचेतक रमेश लेखकले समिति बनाएर गृहमन्त्री रवि लामिछानेमाथि अनुसन्धान हुने सुनिश्चित गरेर मात्रै सदनमा आउन आग्रह गरे । “सदन चल्न दिने र नदिने कुनै कन्फ्युजन नै छैन । समिति बनाउनुुुस् । माननीय रवि लामिछानेमाथि अनुसन्धानको सुनिश्चितता गर्नुस्,” उनले भने, “समिति बनाएर सदनमा आउनुस् । विश्वासको मत मात्रै होइन । सरकारका जति कार्यसूची छन् । राति २ बजेसम्म सदन चलाउनुस् हामी तयार छौँ ।” 

प्रधानमन्त्रीले राष्ट्रिय तथा अन्तराष्ट्रिय रूपमा इज्जतपूर्वक विश्वासको मत लिएको सन्देश दिने भए समिति बनाएर आउने उनको विश्वास छ । प्रधानमन्त्री प्रचण्डले आज विश्वासको मत लिने संसद्को कार्यसूची छ ।