काठमाडौं । ट्राफिक प्रहरी जवान ३२ वर्षीय युवराज घिमिरेको हत्या सामान्य विवादका कारण चोरी गर्ने र फोहोर संकल्न गर्ने समूहले गरेको खुलेको छ । काठमाडौं प्रहरीको विशेष टोलीले घिमिरेको हत्याका संलग्न सातजनालाई पक्राउ गरेर आइतबार सार्वजनिक गरेको हो ।

पक्राउ पर्नेहरूमा भक्तपुरका २१ वर्षीय आइते भन्ने सचिन परियार, नुवाकोटका १८ वर्षीया अञ्जली श्रेष्ठ, स्याङ्जाका २१ वर्षीया विपना वसन्ती भन्ने वसुन्धरा कार्की, स्याङ्जाका विजय चौधरी, ५६ वर्षीया नुनमाया कार्की छन् ।

त्यस्तै, नुवाकोटका २१ वर्षीय बुद्धलामा तामाङ, सिन्धुपाल्चोकका ३० वर्षीय दोर्जे अमृत तामाङ, एकजना १३ वर्षीय नाबालक छन् । उनीहरूले सामान्य विवादका कारण घिमिरेको हत्या गरेको खुलेको काठमाडौं प्रहरीका एसएसपी वसन्त रजौरेले जानकारी दिए ।

आराेपीहरू

उनीहरूमाथि थप अनुसन्धान जारी रहेको छ । प्रहरीको प्रारम्भिक अनुसन्धानका क्रममा हत्याका मुख्य आरोपी २१ वर्षीय सचिन परियार हुन् । सुरूमा घिमिरेमाथि परियारले नै आक्रमण गरेको खुलेको छ ।

हत्यामा संलग्न सातजना नै मनमैजुलगायतका स्थानका निर्माणाधिन घरहरूमा आश्रय बनाई बस्ने समूह हुन् । उनीहरू फोहोर संकलन गर्नेदेखि निर्माण भइरहेका घरहरूको ज्याला मजदुरी गर्ने गरेको पाइएको छ । त्योबाहेक सचिन विभिन्न चोरीमा संलग्न आरोपी समेत हुन् ।  

यसरी भएको थियो घिमिरेको हत्या

खोटाङ मजुवागढी नगरपालिका–१, का युवराज घिमिरे ट्राफिक प्रहरी कार्यालय दरबारमार्गमा कार्यरत थिए । बिहीबार साँझ ड्युटी सकेर उनी घर जाने भन्दै अफिसबाट निस्किए ।

मोबाइल समेत घर मै छाडेर ड्युटी निस्किएका युवराज अफिसबाट फर्केर सिधै घर नगई तोकेश्वर नगरपालिका–१, स्थित एक खाजा घर पुगे । यसअघि गोंगबु ट्राफिकमा कार्यरत हुँदा समेत उनी त्यहीँ खाना/खाजा खाने गर्थे ।

बिहीबार समेत त्यसैको निरन्तरता थियो । उनी खाजा खाँदै गर्दा सचिन र १८ वर्षीया अन्जली श्रेष्ठ पनि सोही खाजा घरमा खाना खाने भन्दै पुगे । सचिन र युवराजबीच पुरानो चिनजान समेत थियो । भारी बोक्ने तथा ज्याला मजदुरी गर्ने सचिनको अर्को खुंखार अपराध कर्म चोरी समेत हो ।

घटनास्थल

युवराज भेटेपछि भने उनलाई मदिरा सेवनको अफर गरे । युवराजसँगै सचिन, अन्जली तीनजनाले नै मदिरा सेवन गरे । सचिन सहितको समूह पछिल्लो दुई हप्तादेखि तारकेश्वर नगरपालिका–९, मनमैजु बासुकीनाग टोलको एक निर्माणाधीन घरको भुइँ तल्लामा बस्दै आएका थिए ।

मदिरा सेवनपछि सचिनले युवराजलाई त्यही घरमा पुर्‍याउन आग्रह गरे । सुरूमा सचिनको त्यो आग्रह युवराजले स्वीकार गरेका थिएनन् । तर, सचिनले त्यति सहयोग समेत नगर्ने भन्दै युवराजसँग रिसाए ।

त्यसपछि भने युवराजले अन्जलीसहित सचिनलाई समेत आफ्नै बाइकमा राखेर उनी बस्ने ठाउँ पुर्‍याउन हिँडे । तर, खाजाघरबाट भने सचिनले युवराजको हत्या गर्ने उद्देश्यले बासुकीटोल पुर्‍याएको देखिएको अनुसन्धानमा खटिएका एक प्रहरी अधिकारीको दाबी छ ।

मृतक युवराज घिमिरे

ती अनुसन्धान अधिकारीले भने, “युवराजलाई सचिन चिनेकै मान्छे भए पनि त्यसरी बाटोमै बस्ने युवा हुन् भन्ने थाहा नहुन सक्छ । सचिनलाई पुर्‍याएपछि भने उनी त्यहाँबाट भाग्न खोजेका थिए । तर, युवराजको हेलमेट नै खोसेर सचिनले प्रहार गरेको खुलेको छ ।”

खाजा खाँदासमेत युवराजले सचिनसँगै आएकी युवतीलाई आँखा झिम्काएकोे भन्दै सचिन रिसाएको पनि खुलेको छ । सचिनले हेलमेट प्रहार गरेपछि भने वसुन्धरा कार्की, नुनमाया कार्की, बुद्धलामा तामाङ, अमृत तामाङ र नाबालकले समेत अन्धाधुन्दा रड, इँटा र ढुंगाहानी हत्या गरेको खुलेको एसएसपी रजौरे जानकारी दिए ।

घटनास्थल

हत्यापछि भने उनीहरू त्यही रात त्यहाँबाट युवराजले लगाएको लुगा, जुत्ता जलाएर युवराजलाई नांगै म्याट्रेसले छोपेर भागेका थिए । हत्या गरेको राति उनीहरू जरंखुको सडकपेटीमा सुतेको खुलेको छ ।

यसरी खुल्यो हत्याको रहस्य

बिहीबार नै हत्या गरिएका युवराजको शव भने शुक्रबार साँझमात्रै फेला पर्‍यो । मोबाइल समेत नबोकी अफिस गएका युवराजबारे अनुसन्धान गर्न प्रहरीलाई प्राविधिक जटिलता थियो । तर, शव भेटिएको ठाउँ लागुऔषध प्रयोगकर्ताहरूको अखडाजस्तो देखिएपछि प्रहरीले लागुऔषध प्रयोगकर्ताले हत्या गरेको आंशका गर्‍यो ।

शुक्रबार रातिदेखि नै प्रहरीले  बासुकीनाग टोलको क्षेत्रमा लागुऔषध प्रयोग गर्ने र त्यो क्षेत्रमा हिँड्ने शंकास्पद मानिसलाई नियन्त्रणमा लिन थाल्यो । त्यो क्षेत्रमा जडान गरिएका सीसीटीभी तथा विगतमा चोरी लुटपाटमा संलग्नहरूमाथि सोधपुछ थाल्यो ।

बिहीबार हत्या गरेर भागेका सचिनको समूह फेरि शुक्रबार बिहान घटनास्थल पुगे । शुक्रबार उनीहरूले घटनास्थलमा छोडेका आफ्ना केही सामान लिएर फर्किए । सोही सामान लिएर फर्किंदा सीसीटीभीमा १३ वर्षीया नाबालकको फोटो कैद भएको देखियो । सोही फुटेजको आधारमा प्रहरीले शनिबार नै बासुकीनाग टोल क्षेत्रमै हिँडिरहेका नाबालकलाई प्रहरीले पक्राउ गर्न सफल भयो ।

मुख्य आराेपी सचिन

नाबालमाथि सोधपुछपछि भने उनले हत्या सचिनसहितका आरोपीले गरेको बताए । उनीहरू बस्ने सम्भावित ठाउँ समेत ती नाबालकले नै देखाएका थिए । सोही सूचनाका आधामार प्रहरीले उनीहरू बाइसधारा जंगललगायतका विभिन्न ठाउँबाट पक्राउ गर्न सफल भएको हो । सचिनलाई पक्राउ गर्न प्रहरीले एक राउन्ड हवाइ फायर समेत गरेको थियो ।

प्रहरीले हत्याका मुख्य आरोपी सचिन र युवराजको सम्बन्ध कसरी जोडिन पुग्यो भन्नेबारेमा समेत अनुसन्धान थालेको छ । बसपार्क क्षेत्रका अन्य ट्राफिक प्रहरीसँग समेत सचिनको चिनजान रहेको देखिएको छ । सचिन धादिङ र स्वयम्भू क्षेत्रमा चोरी गरेको आरोपमा पक्राउ परेर छुटेको समेत खुलेको छ । हत्यापछि युवराजको पकेटमा रहेको दुई हजार रुपैयाँ समेत लुटेको खुलेको छ । उनी २०७० सालमा प्रहरीमा भर्ना भएर सेवारत थिए । उनका श्रीमती र एक छोरा छन् ।