काठमाडौं । इन्डियन प्रिमियर लिग (आईपीएल)मा ‘एलिमिनेट’ भइसकेको टोली पञ्जाब किंग्सले राजस्थान रोयल्सविरुद्ध पाँच विकेटको जित निकालेको छ । बुधबार गुवाहाटीस्थित बार्सपारा क्रिकेट मैदानमा राजस्थानले प्रस्तुत गरेको १४५ रनको लक्ष्य पञ्जाबले १८.५ ओभरमा पाँच विकेट गुमाएर पूरा गरेको हो ।

पञ्जाबको जितमा कप्तान साम करनले ४१ बलमा पाँच चौका र तीन छक्कासहित अविजित ६३ रन बनाए । राइली रुसो र जितेश शर्माले समान २२, आशुतोष शर्माले अविजित १७ र जोनी बेयरिस्टोले १४ रन जोडे ।

राजस्थानका आवेस खान र युजवेन्द्र चहलले समान दुई विकेट लिए । ट्रेन्ट बोल्टले एक विकेट लिए ।

त्यसअघि, टस जितेर ब्याटिङ रोजेको राजस्थानले निर्धारित २० ओभरमा नौ विकेट गुमाएर १४४ रन बनाएको थियो । राजस्थानका रियान परागले ४८ रन बनाए । रवीचन्द्रन आश्विनले २८, कप्तान सञ्जु सामसन र टम कोहलर–क्याडमोरले समान १८ जोडे । ट्रेन्ट बोल्टले १२ रन बनाए ।

पञ्जाबका साम करन, हर्षल पटेल र राहुल चहरले समान दुई विकेट लिए । अर्शदीप सिंह र नाथन एलिसले समान विकेट लिए ।

जितका बाबजुद प्लेअफ दौडबाट बाहिरिइसकेको पञ्जाबले १३ खेलबाट १० अंक जोडेको छ । प्लेअफमा पुगिसकेको राजस्थानको समान खेलबाट १६ अंक छ । राजस्थानको हारले कोलकाता नाइट राइडर्स शीर्ष स्थानमा रहँदै प्लेअफ खेल्ने निश्चित भएको छ ।