काठमाडौं । अरनिको राजमार्गअन्तर्गत बानेश्वर क्षेत्रमा फल्चा शैलीमा निर्माण गरिएको बस बिसौनी सञ्चालनमा ल्याइएको छ । मंगलबार काठमाडौं महानगरपालिका–१० का वडाध्यक्ष रामकुमार केसीले फल्चा बस बिसौनीको उद्घाटन गरेका हुन् ।

अध्यक्ष केसीले बानेश्वर क्षेत्र राजनीतिक आन्दोलनको केन्द्र भएको भन्दै त्यसक्रममा सम्पदा बिगार्न नहुने बताए । उनले सार्वजनिक सम्पत्तिको रक्षा गर्ने दायित्व सबैको भएकामा जोड दिए ।

उनले परम्परागत निर्माण सामग्री र शैलीको प्रयोग गरेर नमुना बस बिसौनी बनाइएको सुनाए । यस्ता संरचना राजनीतिक आन्दोलनको मारमा पर्न नहुने उनले बताए । बिसौनीको संरक्षणका निम्ति स्थानीयदेखि सबै चनाखो हुन जरुरी रहेको उनले उल्लेख गरे ।

“बानेश्वर क्षेत्र राजनीतिक आन्दोलनको केन्द्र हो । जस्तोसुकै आन्दोलन भए पनि यस्ता संरचना बिगार्नु हुँदैन,” उनले भने, “हामीले परम्परागत निर्माण सामग्री र शैलीको प्रयोग गरेर नमुना बस बिसौनी बनाएका छौँ । राजनीतिक दलहरूसँग आग्रह गर्न चाहन्छु– यस्ता संरचनाहरू राजनीतिक आन्दोलनको मारमा नपरून् ।”

उक्त क्षेत्रमा उस्तै शैलीका दुई बस बिसौनी निर्माण गरिएको छ । बबरमहलबाट बानेश्वरतर्फको सडकखण्डस्थित यी दुई फल्चाको लागत ६२ लाख रुपैयाँ रहेको बताइएको छ ।

यसको निर्माणमा कलात्मक थाम, निदाल र दलिनको प्रयोग गरिएको छ । बस्नका निम्ति काठकै मेच राखिएको छ । बिसौनीभित्र प्रकाशका लागि बत्ती जडान गरिएको छ । न्युज एजेन्सी नेपाल