काठमाडौं । चीनमा यही वैशाख दोस्रो साता भएको अन्तर्राष्ट्रिय उसु आमन्त्रित प्रतियोगितामा पदक विजेता खेलाडीलाई उसु महासंघ नगदसहित सम्मान गर्ने भएको छ । महासंघले आइतबार पत्रकार सम्मेलनमार्फत प्रतियोगितामा पदक जितेका ६ खेलाडीलाई नगदसहित सम्मान गर्ने जनाएको हो ।

अन्तर्राष्ट्रिय उसु महासंघको आयोजनामा जियाङ्सु प्रान्तको जियानझिङमा वैशाख दोस्रो साता सम्पन्न प्रतियोगितामा नेपालले दुई रजत र चार कास्यसहित कुल ६ पदक जितेको थियो ।

रजत विजेता खेलाडीलाई जनही १० हजार र कास्यपदक विजेतालाई सात हजार रुपैयाँसहित आउँदो शनिबार बौद्धमा सम्मान गरिने महासंघका महासचिव ल्हाक्पा छिरी लामाले जानकारी दिए ।

नेपालले सान्सौँ विधातर्फ एकलमा दुई रजत र दुई कास्यपदक जितेको थियो । थाउलो विधाको एकल र टिम इभेन्टमा पनि समान एक कास्यपदक जितेको थियो । सान्सौँ विधाको पुरुष ८० केजी तौल समूहमा सञ्जीव महर्जन र सोही विधाको महिला ५६ केजी तौल समूहमा विद्या गुरुङले रजतपदक जितेका थिए ।

सञ्जीव इरानी खेलाडीसँग र विद्या टर्कीकी खेलाडीसँग फाइनलमा पराजित भएका हुन् । स्वर्णपदक ल्याउन नसके पनि सञ्जीव र विद्या दुवै आउँदो नोभेम्बरमा अस्ट्रेलियामा हुने उसुको सान्सौँ विश्वकपमा छनोट हुन सफल भएका छन् ।

फाइनल पुग्नुअघि विद्याले बंगलादेशी खेलाडी मोस्ट शिखा खातुनलाई सेमिफाइनलमा ११–३, ७–३, १२–१, १०–५ र ४–१ ले हराएकी थिइन् ।  सञ्जीवले भने सेमिफाइनलमा सेनेगलका खेलाडीलाई स्तब्ध पारेका थिए ।

प्रतियोगितामा नेपालका तर्फबाट सर्वाधिक ९.६६३ स्कोर प्राप्त गरी दीपक हमालले कास्यपदक जितेका थिए । १८ राष्ट्रका खेलाडी सहभागी थाउलोको नानछ्वान इभेन्टमा दीपकले कास्यपदक जितेका हुन् । उनी आउँदो अक्टोबरमा जापानमा हुने थाउलोको विश्वकपका निम्ति छनोट भएका छन् ।