काठमाडौं । नेकपा (एकीकृत समावादी)की सचिव रामकुमारी झाँक्रीले अहिलेको राजनीतिले संघीयता बचाउन नसक्ने बताएकी छन् । बिहीवार काठमाडौंमा नेपाली कांग्रेसका नेता स्व. प्रदीप गिरिको स्मृति सभामा आयोजित कार्यक्रममा बोल्दै उनले संघीयता सबलीकरणका लागि शासकीय स्वरुप वा निर्वाचन प्रणाली फेर्न जरुरी रहेको बताइन् । 

उनले भनिन्, “हामीले कि शासकीय स्वरुप फेरौँ, कि हामीले निर्वाचन प्रणाली फेरौँ, कानुनमा केही न केही फेरौँ । केही पनि नफेरिकन हामी कतै पुग्दैनौँ । संघीयता कसरी बाँच्छ । यो राजनीतिले कसरी बचाउला यो संघीयता ?”

शासकीय स्वरुप र निर्वाचन प्रणाली नफेरिकन कतै नपुगिने भन्दै उनले संघीयताले पूर्णता पाउने कुरामा आफू विश्वस्त नरहेकाले  संघीयता कहिलेसम्म हो भन्नेकुरामा शंका रहेको बताइन् । 

स्थानीय तहलाई जवाफदेही बनाउन आवश्यक रहेको सचिव झाँक्रीको भनाइ छ । उनले समानुपातिक र प्रत्यक्ष निर्वाचित गरी २७५ जना सांसद चुनिसकेपछि राष्ट्रियसभामा फेरि ५९ जना किन चाहियो भन्दै प्रश्न गरिन् । 

उनले राष्ट्रियसभामा ५९ सांसद कायम राख्ने हो भने समानुपातिक प्रणाली हटाउनुपर्ने जिकिर गरिन् । सचिव झाँक्रीले निर्वाचनको थ्रेस होल्ड बढाउनुपर्ने बताइन् । नेपालका ४० लाख मानिस विचौलियाको धन्दा गरेर जीविकोपार्जन गर्ने गरेको दाबी गरिन् ।