विराटनगर । कोसी प्रदेशको मुख्यमन्त्रीमा एमालेका हिक्मत कार्कीले दाबी पेस गरेपछि समर्थन गर्ने सांसदको सनाखत गराउन प्रदेश प्रमुखले निर्देशन दिएका छन् ।‌

 एमाले-माओवादी संसदीय दलका नेता र सांसद  प्रदेश प्रमुखको कार्यालयमा भेला भई दाबी पेस गरेका थिए ।  दुई दलका ५२ सांसदले हस्ताक्षर गरी दाबी पेस गरेका थिए । 

दुई दलले एमाले संसदीय दलका नेता हिक्मत कार्कीलाई मुख्यमन्त्री बनाउन माग गर्दै दाबी पेस गरेलगत्तै  प्रदेश प्रमुख पर्शुराम खापुङले संविधानको धारा १६८ को उपधारा ५ बमोजिम सरकार गठन गर्न समर्थन गरेका सांसदलाई परिचय पत्र सहित उपस्थित गराइ सनाखत गर्न निर्देशन दिएका हुन् । 

नेकपा एमालेका प्रमुख सचेतक रेवतिरमण भण्डारीले सबै सांसद प्रदेश प्रमुखको कार्यालयमा भेला भई सनाखत गर्ने बताए । दुई दलले मुख्यमन्त्री केदार कार्कीलाई दिएको समर्थन फिर्ता गरी वैसाख ७ गते प्रदेश सभाबाट संकल्प प्रस्ताव पारित गरी कार्कीलाई विश्वासको मत लिन भनेका थिए ।‌  प्रदेश प्रमुखले असंवैधानिक कदम चालेको भन्दै रिट दायर गर्न मुख्यमन्त्री कार्की सर्वोच्च अदालत पुगेका छन् ।