काठमाडौं । गायिका मेनुका पौडेललाई भीडमा जाँदा सधैँ एउटा कुराले सताइरहन्थ्यो, मेरो आँखा देखेर कोही डराए कि, बालबालिका तर्सिए कि । यही सोचका बीच उनले नेपाल आइडल हुँदै इन्डियन आइडलको टप टेन यात्रा पार लगाइन् । मेनुका अहिले अन्तर्राष्ट्रिय स्टेजमा समेत सजिन थालेकी छिन् । 

जन्मजात नै आँखाको ज्योति गुमाएकी मेनुकालाई गायिकाको रूपमा स्थापित भइसकेपछि भने आफ्नो स्वरजस्तै भौतिक शरीर पनि राम्रो देखिनुपर्छ भन्ने लागिरह्यो । 

इन्डियन आइडलमा प्रतिस्पर्धा गर्दैगर्दा उनको चस्मामा क्यामेरा जडान गरी त्यसले रेकर्ड गरेका दृश्य आवाजमार्फत् मोबाइलले जानकारी दिने एआई प्रविधि प्रयोग गरियो । जसको सहायताले अहिले मेनुकालाई अरुको आवाज सुन्न र मान्छे चिन्न सहज भएको छ । 

सामान्यभन्दा केही ठूला देखिने र अगाडि आएका दाँत पनि मेनुकालाई आफ्नो राम्रो लुक्सको बाधक लाग्यो । केही महिनाअघि मात्रै उनले चारवटा दाँत निकालेर अलाइनर गराइन् ।  चिटिक्क देखिने मेनुकाको इच्छाअनुसार नै सोमबार उनको आँखाको शल्यक्रिया गरियो, अब उनलाई दृष्टिविहीनजस्तो नभई सामान्य लुक्समा देख्न सकिनेछ । 

“म त अहिले राम्री भएकी छु नि”, मेनुकाले बाह्रखरीसित आफ्नो खुसी साटिन् । तिलगंगा आँखा प्रतिष्ठानमा उनको सोमबार आँखाको संरचना मिलाउने उपचार गरियो, जसलाई मेडिकल भाषामा  ‘कस्मेटिक प्रोथेस्टिक’ भनिन्छ । 

तिलगंगा आँखा प्रतिष्ठानकी वरिष्ठ अकुप्लाष्टिक सर्जन डा. पूर्णिमा राजकर्णिकारको टिमले सोमबार उनको उपचार गर्‍यो । मेनुकाको दुवैतर्फ कृत्रिम आँखा (आइबल) राखिएको हो । सो क्रममा बायाँ आँखाको शल्यक्रिया गर्नुपरेको, तर दायाँमा भने शल्यक्रिया नगरी आइबल राखिएको मेनुका बताउँछिन् । 

केही घन्टामा नै गरिएको शल्यक्रियापछि उनी अहिले घरमै स्वास्थ्यलाभ गरिरहेकी छिन् । आइबल सेट हुन ६ हप्ता लाग्ने अस्पतालले जनाएको छ । यो उपचारले मेनुकाको आँखाको ज्योति भने फर्काउने छैन, अर्थात् दृष्टिका लागि गरिएको शल्यक्रिया होइन । 

जन्मँदै प्राकृतिक रूपमा आँखाको ज्योति गुमाएकाहरूको दृष्टि फर्काउने प्रविधि अलिहेसम्म चिकित्सा विज्ञानमा विकास भएको छैन । 

“मलाई सामान्य मानिसजस्तै अनि राम्री देखिन भित्रैदेखि रहर थियो, मैले इन्डियामा रहँदा दुई सहरमा यो प्रविधिबारे बुझेकी थिएँ । नेपालमा उपचार छ कि छैन भनि बुझ्दा, तिलगंगामा हुनेरहेछ, लन्डनबाट फर्किएपछि गर्ने कुरा भएको थियो,” मेनुकाले भनिन् । 

“प्रविधीले विकास गरेको उपचार विधिबाट फाइदा हुन्छ भने किन नगर्ने,” उनलाई लाग्यो ।  शल्यक्रियापछि आफू निकै खुसी रहेको र अब लगत्तै प्रस्तुतिका लागि अमेरिका जान लागेको उनले बताइन् । “अब तपाइँहरुले मलाइ कालो चस्मा नलगाएकी राम्री गायिका देख्नुहुनेछ, बच्चाहरू पनि मसँग डराउने छैनन्,” मेनुका भन्छिन् ।