काठमाडौं । काठमाडौं उपत्यकासहित पहाडी भूभागमा मेघगर्जन र चट्याङसहित वर्षा भएको छ । आइतबार अपराह्न काठमाडौं उपत्यकासहित पहाडी भूभागमा पनि सामान्य वर्षा भएको हो ।
जल तथा मौसम विज्ञान विभाग मौसम पूर्वानुमान महाशाखाका मौसमविद् सरोज पुडासैनीका अनुसार पश्चिमी वायु र स्थानीय वायुको प्रभावले सामान्य वर्षा भएको हो ।
महाशाखाका अनुसार कोसी, वाग्मती र गण्डकी प्रदेशका पहाडी भागमा वर्षा भएको हो ।
आज राति पनि कोसी, गण्डकी र कर्णाली प्रदेशका पहाडी भू–भागका थोरै स्थानमा मेघगर्जन / चट्याङसहित हल्का वर्षाको सम्भावना रहेको छ । कोसी र गण्डकी प्रदेशको उच्च पहाडी तथा हिमाली भू–भागका एक–दुई स्थानमा हल्का हिमपातको सम्भावना रहेको महाशाखाले जनाएको छ ।
भोलि दिउँसो कोसी, गण्डकी र कर्णाली प्रदेशसहित देशका पहाडी भू–भागमा आंशिकदेखि साधारणतया बदली रहनेछ । बाँकी भू–भागमा आंशिक बदलीदेखि मौसम सामान्यतया सफा रहने महाशाखाले जनाएको छ ।
भोलि कोसी र गण्डकी प्रदेशका थोरै स्थानहरूमा मेघगर्जन र चट्याङसहित हल्कादेखि मध्यम वर्षाका साथै बाँकी पहाडी भू–भागका एक–दुई स्थानमा मेघगर्जन र चट्याङसहित हल्का वर्षाको सम्भावना रहेको पूर्वानुमान गरिएको छ ।