काठमाडौं । सुदूरपश्चिमका मुख्यमन्त्री दीर्घ सोडारीले विश्वासको मत लिने विषय पेचिलो बनेको छ । नेकपा (एमाले)ले निर्णय नगर्दा  शुक्रबार र शनिबार विश्वासको मत लिने प्रयोजनका लागि बोलाइएको प्रदेशसभाको बैठक स्थगित भयो । अर्को बैठकको मिति तोकिएको छैन । 

एमाले विश्वासको मत दिन हतार नगर्ने पक्षमा देखिएको छ । विश्वासको मतबारे सुदूरपश्चिम संसदीय दलका नेता राजेन्द्र रावललगायतले अध्यक्ष केपी शर्मा ओलीसँग शनिबार राति भेट गरेका थिए ।

विश्वासको मत लिनका लागि जेठ ५ गतेसम्म समय भएकाले अहिले नै हतार गर्नुपर्ने अवस्था नरहेको रावल बताउँछन् । “नेतृत्वसँग परामर्श गर्दै छु । हतारो गर्नुपर्ने छैन, जेठ ५ गतेसम्म समय छ,” ओलीसँगको भेटपछि रावलले भने ।  

अध्यक्ष ओली केन्द्रमा देखिएका समस्या पनि समाधान गरेर मात्रै विश्वासको मत दिनुपर्ने पक्षमा रहेको रावलले बताए । “विश्वासको मतबारे उहाँ त्यस्तो नकारात्मक हुनुहुन्न । केन्द्रमा पनि समस्या देखिएका छन् । सबै  समस्याको समाधान एकैपटक निकालौं भन्ने पक्षमा हुनुहुन्छ,” रावलले भने । 

नेकपा (एकीकृत समाजवादी) का अध्यक्ष माधवकुमार नेपालका पछिल्ला अभिव्यक्ति र गतिविधिबारे छलफल गर्नुपर्ने पक्षमा ओली छन् । सुदूरपश्चिम प्रदेशमा मुख्यमन्त्री बनाउन एमालेले आनकानी गर्दा नेपालले कांग्रेस सभापति शेरबहादुर देउवासँग भेटवार्ता गरेका थिए । एमालेले नसघाए कांग्रेसले सहयोग गर्ने सहमति उनीहरूबीच बनेको थियो । तर, एमालेले समर्थन गरेपछि सोडारी वैशाख ६ मा मुख्यमन्त्री बनेका थिए । 

माधव नेपाल कांग्रेससहितको गठबन्धन बनाउनका लागि लागिपरेको ठम्याइ एमालेको छ । शनिबार रसुवा जिल्ला अधिवेशनमा ओलीले नेपाललाई लक्षित गर्दैै प्रधानमन्त्री बन्न हतार गरिरहेको टिप्पणी गरेका थिए । 

“मलाई अचम्म लाग्छ, किन त्यस्तो हतार छ ? कसले रिस गर्‍यो ? किन रिस गर्‍यो ? हामी अहिले एउटा अभियानमा छौँ, यो देश प्रधानमन्त्री हुनमात्रै हो, प्रधानमन्त्री हुन हर्‍याकहर्‍याक दमको बिरामीले जस्तो गर्दैछन्,” ओलीको कटाक्ष थियो । 

रावलले बझाङ क्षेत्र नम्बर १ ‘क’ मा सांसद थपिएको र उनी बुबाको निधनले बाहिर निस्कन बाँकी रहेकाले पनि मतबारे निर्णय गर्न पर्खिएको बताए । 

माधव नेपालले आफ्ना कुरा राखिरहेको विषयमा समीकरणका नेताहरूका बीचमा पनि छलफल चलिहरेको होला,” रावलले भने, “प्रदेशमा पनि उमेदवार पर्सीबाट बाहिर निस्कनुहुन्छ । उहाँले शपथ लिन बाँकी नै छ । सरकारका लागि हामीले सहजीकरण गरेका छौँ । एक सांसद थपिनुभएको छ ।” 

एकीकृत समाजवादीका सोडारीलाई मुख्यमन्त्री बनाउन एमालेका तत्कालीन १०, माओवादीका १०, नागरिक उन्मुक्ति पार्टीका सात, एकीकृत समाजवादीका चार र एकजना स्वतन्त्र सांसदले हस्ताक्षर बुझाएका थिए । तर, नागरिक उन्मुक्तिका पाँच सांसदले सोडारीलाई समर्थन नगरेको जानकारी प्रदेशसभामा बुझाएका थिए ।