काठमाडौं । कर्णाली प्रदेशका मुख्यमन्त्री यामलाल कँडेलले दोस्रोपटक मन्त्रिपरिषद् विस्तार गरेका छन् । मंगलबार सुर्खेतमा प्रदेश सरकारका नवनियुक्त चार मन्त्रीले पद तथा गोपनीयताको शपथ लिएका हुन् । प्रदेश प्रमुख तिलक परियारले उनीहरूलाई शपथ खुवाए ।

यस दिन शपथ लिनेमा भौतिक पूर्वाधार तथा सहरी विकासमन्त्री शेरबहादुर बुढा, आर्थिक मामिला तथा योजनामन्त्री महेन्द्र केसी, सामाजिक विकासमन्त्री वीरबहादुर शाही र उद्योग, पर्यटन, वन तथा वातावरणमन्त्री दुर्गा रावत छन् । यस्तै, राज्यमन्त्री गोमता विकले पनि शपथ लिइन् ।

कृषिमन्त्रीमा नियुक्त विनोदकुमार शाहले भने शपथग्रहण समारोह बहिष्कार गरे । मुख्यमन्त्री कँडेलले कृषि मन्त्रालयको जिम्मेवारी दिएपछि उनले असन्तुष्टि जनाएका हुन् ।

उनले भौतिक पूर्वाधार तथा सहरी विकास मन्त्रालयमा दाबी गरेका थिए । तर, कृषि मन्त्रालयको जिम्मेवारी दिइएपछि शाहले शपथग्रहण समारोह नै बहिष्कार गरेका हुन् । हिमालयन टेली भ्वाइस