काठमाडौं । नवीन सुब्बा निर्देशित सिनेमा ‘गाउँ आएको बाटो’को रिलिज डेट परिवर्तन भएको छ । जेठ १८ गते रिलिज हुने भनिएको यो चलचित्र अब जेठ २५ गते रिलिज हुनेछ । 

चलचित्रमा दयाहाङ राई, पशुपति राई तथा प्रसान राई प्रमूख भूमिकामा छन् ।

‘नुमाफुङ’ सिनेमा बनाएर फरक धारका सिनेमाका लागि प्रशंसा बटुलेका सुब्बाको यो तेस्रो सिनेमा हो । उनले बनाएको दोस्रो सिनेमा ‘गुडबाई काठमाडौं’ भने सार्वजनिक प्रदर्शनमा आएको छैन ।

टोरोन्टो र बुसान फिल्म फेस्टिभलमा समेत प्रशंसा बटुलेको ‘गाउँ आएको बाटो’को पटकथा निर्देशक सुब्बाले महेश राईसँगको सहकार्यमा लेखेका छन् । मेन्छ्याम फिक्चर्स तथा बाँसुरी फिल्मसको संयुक्त ब्यानरमा निर्माण भएको सिनेमाका निर्माता अमोद राई र निर्देशक सुब्बा हुन् । 

यो सिनेमाको अन्तर्राष्ट्रिय रिलिजको राइट्स सेभेन सिजले खरिद् गरेको छ । 

सिनेमाले पूर्वी नेपालको हिमाली क्षेत्रमा बाँसको चोयाबाट डोकाडालो बनाएर जीवन यापन गर्ने माइला (दयाहाङ राई), माइली (पशुपति राई) र उनीहरूको सात वर्षे छोरा बिन्द्रे ( प्रसान राई)को उक्त गाँउमा मोटरबाटो भित्रिएसँगै आएका आधुनिक परिवर्तन र संघर्षको कथा पेस गर्छ ।

सिनेमाले मूलपात्रले पछ्याउँदै आएको परम्परागत जीवनशैलीमाथि के गर्ने भनेर लिने निर्णयमा सिनेमाको कथा केन्द्रित छ । यसलाई बाबुआमासँगै उनीहरूको छोराले  विकाससँगै बदलिएको परिस्थितिमा नयाँ संसारमा कसरी घुलमिल हुन्छ र उसका सपना कसरी फेरिन्छन् भन्ने कथा सिनेमाले भन्ने निर्माण पक्षले जनाएको छ । 

सिनेमाको कार्यकारी निर्मातामा सञ्जु राई, देवराज राई, नरहाङ राई र भीम राई छन् ।