काठमाडौं । स्पेनिस क्लब बार्सिलोनाका मुख्य प्रशिक्षक जाभी हर्नान्डेजले क्लबको जिम्मेवारी नछोड्ने भएका छन् । अन्तर्राष्ट्रिय सञ्चारमाध्यमहरूले खुलाएअनुसार जाभीले क्लबसँगको सम्झौता सन् २०२५ को जुनसम्मका लागि नवीकरण गरेका हुन् ।

यसअघि स्पेनबाट विश्वकपको उपाधि समेत जितेका ४४ वर्षीय जाभीले जनवरीमा सिजनको अन्त्यसँगै क्लबको जिम्मेवारी छोड्ने घोषणा गरेका थिए । जाभीले सन् २०२१ मा कतारी क्लब अल सादको जिम्मेवारी छोड्दै बार्सिलोनामा आएका थिए । जाभी मुख्य प्रशिक्षक बनेको पहिलो सिजन नै बार्सिलोनाले ला लिगाको उपाधि जितेको थियो ।

तर, जारी सिजन खराब लयबाट गुज्रिरहेको बार्सिलोना ला लिगामा शीर्ष स्थानको रियाल मड्रिडभन्दा ११ अंकले पछि छ । गएको हप्ता क्वार्टरफाइनलमा पेरिस सेन्ट जर्मन (पीएसजी)विरुद्ध पराजित भएपछि बार्सिलोना च्याम्पियन्स लिगबाट समेत बाहिरिएको थियो ।

बार्सिलोनाबाट खेलाडी करियरमा २५ उपाधि जितेका जाभीले जनवरीमा भियारियालविरुद्ध पराजित भएपछि क्लबको जिम्मेवारी छोड्ने घोषणा गरेका थिए । तर, त्यसयता भने बार्सिलोना घरेलु लिगका १० खेलमा अपराजित यात्रा कायम गरेको थियो ।