बेइजिङ । अमेरिकामा आफ्नो एप बन्द गर्न खोजेर अमेरिकाले १७० मिलियन (१७ करोड) अमेरिकी नागरिकको अभिव्यक्ति स्वतन्त्रतालाई कुल्चने प्रयास गरेको टिकटकले आरोप लगाएको छ ।

अमेरिकी तल्लो सदन कंग्रेसले गएको शनिबार टिकटकको सञ्चालक बाइटडेन्सले आफ्नो चीनसँगको सम्बन्ध नतोडे अमेरिकामा रोक लगाउने पक्षमा मतदान गरेको थियो । सोसम्बन्धी कानुन अमेरिकी विदेश नीति प्याकेजअन्तर्गत बन्न लागेको छ । त्यसमा युक्रेन, इजरायल र इण्डो—प्यासिफिकसम्बन्धी सहयोगको प्याकेजसमेत छ । जुन अर्को साताको सुरूसम्ममा कानुन बन्नेछ । अमेरिकाले टिकटकका मालिकको सम्बन्ध बेइजिङसँग भएको जनाउँदै आएको छ भने टिकटकले सो कुरा अस्वीकार गरिरहेको छ ।

अमेरिकी सिनेटले सोसम्बन्धी विधेयक पास गरेपछि राष्ट्रपतिले त्यसमा हस्ताक्षर गर्नेछन् र कानुन बन्नेछ । सो विधेयक कानुन बनेपछि टिकटकलाई उसको हिस्सेदारी बेच्नको लागि नौ महिनाको समय दिइएको छ । त्यसको प्रक्रिया लम्बिएमा थप तीन महिनाको समय दिन सकिनेछ । त्यसो हुन नसकेमा अमेरिकामा रोक लाग्नेछ ।

टिकटकका प्रवक्ताले भने अमेरिकी नागरिकको अभिव्यक्ति स्वतन्त्रतामा बन्देज लगाउने प्रयास भन्दै टिकटकले अहिले वार्षिक रूपमा २४ बिलियन डलर अमेरिकी अर्थतन्त्रमा योगदान पु¥याइरहेको कुरा पनि स्मरण गराएको छ ।

टिकटकले यसका सञ्चालक चीन वा अन्य कुनै देशको एजेन्ट नभएको जनाएको छ । अमेरिकी कंग्रेसले गएको मार्च महिनामा पनि गैरचिनियाँ नागरिकलाई टिकटक बेच्न ६ महिनाको समय दिएको थियो । सोविधेयक सिनेटमा विचाराधीन अवस्थामा रहेकोले कानुन भने बन्न सकेन । बीबीसी