काठमाडौं । इन्डियन प्रिमियर लिग (आईपीएल)मा दिल्ली क्यापिटल्सले गुजरात टाइटन्समाथि सानदार जित निकालेको छ । बुधबार राति गुजरातले दिएको ९० रनको सामान्य लक्ष्य दिल्लीले चार विकेटको क्षतिमा ८.५ ओभरमै भेटाएको हो ।

टस हारेपछि सुरुमा ब्याटिङको निम्तो पाएको ‍‍गुजरातले १७.३ ओभरमा सबै विकेट गुमाएर ८९ रनमात्र बनाउन सक्यो ।

गुजरातका लागि राशिद खानले सर्वाधिक ३१ रन बनाए । साई सुदर्शनले १२ रन, राहुल टेवाटियाले १० रन बनाउँदा अन्य ब्याटरले दोहोरो अंकमा रन जोड्न सकेनन् ।

बलिङतर्फ दिल्लीका मुकेश कुमारले तीन विकेट लिए । इशान्त शर्मा र ट्रिस्टन स्टब्सले दुई–दुई विकेट लिँदा खालिद अहमद र अक्षर पटेलले एक–एक विकेट लिए ।

जवाफी ब्याटिङमा आएको दिल्लीका लागि ज्याक फ्रेसर गर्कले सर्वाधिक २० रन बनाए । शाई होपले १९ रन बनाउँदा रिशव पन्तले १६ र अभिषेक पोरेलले १५ रन बनाए । पृथ्वी शले सात रन र सुमित कुमारले ९ रन बनाए ।

बलिङतर्फ गुजरातका सन्दीप वारियरले दुई विकेट लिए । राशिद खान र स्पेन्सर जोनसनले एक–एक विकेट लिए ।

अंक तालिकामा दिल्ली छैटौँ र गुजरात सातौँ स्थानमा छन् ।