काठमाडौं । संसदीय सुनुवाइ समितिले महालेखा परीक्षकमा प्रस्तावित तोयम रायको नाम सर्वसम्मतले अनुमोदन गरेको छ ।सिंहदरबारमा मंगलबार बसेको समिति बैठकले महालेखा परीक्षकमा प्रस्तावित रायको संसदीय सुनुवाइ गर्दै उनको नाम सर्वसम्मतले अनुमोदन गरेको हो ।

संवैधानिक परिषद्ले चैत्र १८ गते रायाको संसदीय सुनुवाइका लागि समितिमा पत्र पठाएको थियो । त्यसपछि समितिले रायविरुद्ध उजुरी आह्वान गर्दा एकमात्र उजुरी परेको थियो । प्राप्त उजुरी र सूचनाका आधारमा संसदीय सुनुवाइपछि रायलाई नियुक्तिका लागि सर्वसम्मतले अनुमोदन गरिएको समिति सभापति पशुपतिशम्भेर जवराले जानकारी दिए ।

त्यसअघि संसदीय सुनुवाइका क्रममा रायले भावी कार्ययोजनाका बारेमा समितिमा जानकारी गराएका थिए । उनले लेखापरीक्षणबाट औल्याएका विषयहरूलाई एकरुपता ल्याउनुपर्ने, सूचना प्रविधिको अधिकतम प्रयोग गर्नुपर्ने बताए । समयमा नै लेखा परीक्षण हुन नसकेका निकायहरूलाई तत्काल लेखा परीक्षणको दायरामा ल्याउनुपर्ने उनले बताए । उनले बेरुजुको बिषयमा प्रदेशहरूसँग छलफल गर्न देखिएका समस्या समाधान गर्नुपर्ने औंल्याए ।

गत जेठमा टंकमणि शर्मा दंगालको कार्यकाल सकिएपछि महालेखापरीक्षकको पद लामो समयदेखि रिक्त रहँदै आएको थियो ।