काठमाडौं । ओपनर रोहित शर्माको शतकका बाबजुद इन्डियन प्रिमियर लिग (आईपीएल)मा मुम्बई इन्डियन्सले चेन्नाई सुपर किंग्सविरुद्ध २० रनको हार व्यहोरेको छ ।

सोमबार घरेलु मैदान वान्खडेमा चेन्नाईले प्रस्तुत गरेको २०७ रनको लक्ष्य पछ्याउने क्रममा मुम्बईले निर्धारित २० ओभरमा ६ विकेट गुमाएर १८६ रन मात्र बनाउन सक्यो ।

मुम्बईका ओपनर रोहितले ६३ बलमा ११ चौका र पाँच छक्कासहित १०५ रन बनाए पनि टिमको हार टार्न सकेनन् । तिलक वर्माले ३१, इशान किशनले २३ र टिम डेविडले १३ रन जोडे ।

चेन्नाईका मथिसा पथिरानाले चार विकेट लिए । चार ओभर बलिङ गरेका पथिरानाले २८ रन खर्चिए । तुसार देशपाण्डे र मुस्ताफिजुर रहमानले समान एक विकेट लिए ।

त्यसअघि, टस हारेर ब्याटिङमा उत्रिएको चेन्नाईले २० ओभरमा चार विकेट गुमाएर २०६ रन बनाएको थियो ।

चेन्नाईका कप्तान रितुराज गाइकवाडले ४० बलमा समान पाँच चौका र छक्कासहित ६९ रनको योगदान गरे । शिवम दुबेले ६६ रन थपे । रचिन रवीन्द्रले २१, एमएस धोनीले २० र डार्यल मिचेलले १७ रन जोडे ।

मुम्बईका हार्दिक पाण्ड्याले दुई विकेट लिए । गेराल्ड कोएट्जी र श्रेयस गोपालले एक/एक विकेट लिए ।

जितसँगै ६ खेलबाट आठ अंक जोडेको चेन्नाई तालिकाको तेस्रो स्थानमा उक्लिएको छ । समान खेलबाट चार अंकको मुम्बई आठौँ स्थानमा छ ।