दाङ । दाङमा माटोको ढिस्कोले पुरिएर दुई बालकको मृत्यु भएको छ । घोराही उपमहानगरपालिका–९, आन्द्राभरैयाका १२ वर्षीय आशीष चौधरी र सोही ठाउँका १२ वर्षीय माधव चौधरीको मृत्यु भएको जिल्ला प्रहरी कार्यालयका प्रमुख एवं प्रहरी उपरीक्षक रामबहादुर केसीले जानकारी दिए ।

आन्द्राभरैयाका चार बालक घरदेखि करिब ५०० मिटर टाढा रहेको कर्मटे भन्ने स्थानमा बबई नदीको किनारमा खेल्न गएका बेला माटोको ढिस्कोमा पुरिएको प्रहरीको भनाइ छ ।

आइतबार दिउँसो खेल्न गएका मध्ये तीन बालक खाल्डोमा परेका थिए । एक बालकको उद्धार गरिए पनि दुईजना गहिरो खाल्डोमा पुरिएका थिए ।

पुरिएकालाई गाउँलेले उद्धार गरी राप्ती स्वास्थ्य विज्ञान घोराहीमा उपचारका निम्ति लगिएकामा अस्पतालले मृत घोषणा गरेको प्रहरी प्रमुख केसीले जानकारी दिए ।

उनीहरूका शव परीक्षणका लागि राप्ती स्वास्थ्य विज्ञान प्रतिष्ठान घोराहीमा राखिएको छ । खाल्डो किन खनिएको थियो भन्ने बारेमा अनुसन्धान भइरहेको प्रहरीले जनाएको छ । रासस