काठमाडौं । एप्पलले बुधबार ९२ देशका आइफोन प्रयोगकर्तालाई साइबर आक्रमणको निशाना बनेको भन्दै सावधानी अपनाउन चेतावनी जारी गरेको छ ।

कम्पनीले बुधबार प्यासिफिक समयअनुसार दिउँसो १२ बजे ९२ देशका प्रयोगकर्तालाई अर्लट पठाएको हो । कुन देशको आक्रमणकारी हुन् र कुन देशका नागरिकलाई अर्लट पठाइयो भन्नेबारे खुलाएको छैन ।

कम्पनीले स्पाइवेयर आक्रमणबाट लक्षित हुन सक्ने चेतावनी ती प्रयोगकर्ताहरूलाई दिएको हो । “तपाईं एक भाडाको स्पाइवेयर आक्रमणको निशानामा हुनुहुन्छ । जसले तपाईंको आइफोनलाई टाढैबाट ह्याक गर्न खोजिरहेको छ,” एप्पलले एप्पल आईडीसमेत खुलाउँदै चेतावनी जारी गरेको छ ।

“यो आक्रमण तपाईंको हो र तपाईं के गर्नुहुन्छ भन्नेअनुसार भइरहेको छ। अन्य कुरा निश्चित नभए पनि एप्पललाई चेतावनीमा उच्च विश्वास छ, कृपया यसलाई गम्भीरतापूर्वक लिनुहोला,” कम्पनीले अर्लटमा भनेको छ ।

एप्पलले एक वर्षभरीमा यस्तो चेतावनी धेरै पटक जारी गरेको बताइएको छ । सन् २०२१ यता १५० भन्दा बढी देशका प्रयोगकर्तालाई एप्पलले यस्तो अर्लट पठाएको पाइएको छ ।