काठमाडौं । राष्ट्रिय प्रजातन्त्र पार्टी (राप्रपा)का प्रमुख सचेतक ज्ञानेन्द्र शाहीले गृहमन्त्रीको आदेशमा मंगलबारको आन्दोलनमा आफूमाथि कुटपिट भएको बताएका छन् । बुधबारको प्रतिनिधिसभा बैठकमा शान्तिपूर्ण आन्दोलन गर्दा १८ जना अस्पतालको बेडमा पुगेको उनले सुनाए । 

“चितवन प्रहरीले पक्राउ गर्दा रवि लामिछानेलाई काँध हालेर हिँड्ने म हुँ । हिजो मलाई गृह मन्त्रालयको आदेशमा डीएसपीलाई कुटपिट गर्न र मैले लगाएको कपडा च्यात्न लगाउनुभयो,” शाहीले भने, “गृहमन्त्रीको हिजोको कदमको घोर भत्सर्ना गर्छु । मान्छे सक्किने बेलामा घरमा आगो लगाउँछ । हिजो काँध थाप्ने मानिसलाई आज कुट्न लगाउनुभयो ।” 

उनले शान्तिपूर्ण आन्दोलन गर्न पाइने भन्दै देशको संविधान ठूलो कि गृहमन्त्री ठूलो भनि प्रश्न गरे । शाहीले ०४७ सालको फाइल खोलौँ भनेर आफूहरूले माग उठाउँदै आएको बताए । अहिले कांग्रेस पार्टीका सांसदले फाइल खोलौँ भनेकोप्रति इंगित गर्दै अहिले नै खोल्न आग्रह गरे । “किन खोलौँ खोलौँ भन्ने चाबी तपाईंहरूको हातमा छ । सबै तपाईंहरूको हातमा छ । आजै अहिल्र्यै खौलौँ । ल, सुरु गरिहालौँ न त । किन टाढा जाने ?,” उनले प्रश्न गरे । 

उनले गृहमन्त्रीलाई थमन विक, निर्मला पन्तको दोषीलाई कारबाही गर्छौँ भनेको कहाँ पुग्यो भनि प्रश्न गरे । त्यस्तै, सहकारी ठगी प्रकरणमा संसदीय छानबिन समिति गठनको माग पनि गरे ।