काठमाडौं । क्रिस्टियानो रोनाल्डोले रातो कार्ड बेहोरेको खेलमा अल हिलालसँग २–१ हार बेहोर्दै अल नासर साउदी सुपर कपको सेमिफाइनलबाटै बाहिरिएको छ ।
सोमबार राति भएको खेलमा अल हिलाललाई जित दिलाउन सलेम अल्दावसरी र माल्कोमले गोल गरे । अल नासरबाट साडियो मानेले गोल फर्काए पनि टिमको हार टार्न सकेनन् ।
खेलको ६१औँ मिनेटमा अल्दावसरीको गोलमा हिलालले अग्रता बनाएको थियो । त्यसको ११ मिनेटपछि नै माल्कोमले हिलालको अग्रता दोब्बर बनाए । इन्जुरी समयमा मानेले गोल गर्दै अल नासरलाई खेलमा फर्काउने प्रयास गरे पनि सफल बन्न सकेनन् । त्यसअघि खेलको ८६औँ मिनेटमा क्रिस्टियानो रोनाल्डो रातो कार्डको दर्शन गर्दै मैदानबाट बाहिरिएपछि अल नासर १० खेलाडीमा समेटिएको थियो ।
जितसँगै फाइनलमा स्थान बनाएको हिलालले अब उपाधिका लागि अल इत्तिहादसँग खेल्नेछ । यी दुई टिमबीचको खेल अप्रिल ११ मा हुनेछ ।
