काठमाडौं । आइतबार दिउँसो २ बजे । सिभिल मलमा सदाझैँ चहलपहल थियो । सिनेमा हेर्न आउने र निस्कनेको भीड मलको माथिल्लो तलमा छँदै थियो । त्यत्तिकैमा क्यूएफएक्सको अडिटोरियम २ को ढोका खुल्यो । ढोका खुले पनि भित्र अँध्यारो थियो । बत्ती बलेको थिएन ।

तर पनि मान्छे भित्र पस्न थाले । घरीघरी बत्ती झ्याप्प झ्याप्प बल्दा कपाल अगाडि फिँजाएका, लाललाल आँखा बनाएका रातो भेषमा रहेका केही युवती कोठाको भित्तामा टाँसिएर यताउता सलबलाइरहेका थिए । उनीहरू घरीघरी अनौठो स्वर निकालेर कराउँथे । हलमा प्रवेश गर्दै गरेका र सिटमा बसेका मान्छे एक्कासि आउने त्यो आवाज र झ्याप्प बल्दा देखिएका अनौठा युवतीको दृश्यले तर्सिइरहेका थिए ।

एकछिन यो क्रम चलिरह्यो । केही समयपछि अडिटोरियमको बत्ती बल्यो । त्यहाँ देखिए ६ एकै खालका युवती । हातपाउ टेकेर यताउता गरिरहेका पाँच महिलाको बीचमा एक युवती उभिएकी थिइन् । उनको हाउभाउ र वेशभूषा पनि फरक थिएन । फरक यति मात्र, उनी उभिएकी थिइन् ।

हातपाउ टेकेर यताउता गरिरहेका र उभिएकी युवती विस्तारै उसैगरी मञ्चमा उक्लिए । मञ्चमा एकछिन उस्तै क्रियाकलापछि उभिएकी युवतीको हातमा माइक देखियो । दुईपटक लामो सास तानिन् र बोल्न थालिन्– स्वागतम ! स्वागतम !! सु–स्वागतम !!! यहाँहरू सम्पूर्णलाई बोक्सीको स्वप्न नगरीमा हार्दिक स्वागत छ । आज हामी केही दृश्यांश यहाँ प्रस्तुत गर्नेछौँ, (जोडले कराइन्) र पूरा रहस्य खुल्नेछ वैशाख १४ गते । ती युवतीले यति बोलिसक्दा नसक्दै अनौठो ध्वनि उसैगरी गुञ्जिए, अक्सर त्यस्तो ध्वनिले धेरै मानिसमा डर पैदा गर्छ । र, ती युवती अरू कोही नभएर अभिनेत्री केकी अधिकारी थिइन् । यो एक्ट थियो, उनको सिनेमा ‘बोक्सीको घर’को ट्रेलर रिलिजअगाडिको ।

यो एक्टपछि वैशाख १४ गते रिलिज हुने चलचित्रको ट्रेलर सार्वजनिक गरियो । समाजमा ‘बोक्सी’ हुन्छन् भन्ने अन्धविश्वास ट्रेलरमा समावेश छ । कथित बोक्सीका नाममा हुने गरेका अन्याय, अत्याचारका विषय मिडियाले उठाउँदा उठाउँदै पनि यो अन्धविश्वास रहेको र यसकै कारण महिला पीडित भइरहेको कथा सार्वजनिक ट्रेलरमा देखिन्छ । समाजले कसरी बोक्सीको आरोप लगाएर मानसिक रूपमा विक्षिप्त हुने अवस्थामा पुर्‍याइरहेको छ भन्ने पक्ष ट्रेलरमा देख्न सकिन्छ ।

केकी अधिकारी मुख्य भूमिकामा रहेको चलचित्रमा सुलक्षण भारतीको लेखन तथा निर्देशन छ ।