लिस्बन (पोर्चुगल) । पोर्चुगलमा समुद्रमा डुबेर एक नेपालीको मृत्यु भएको छ । अर्का नेपाली युवक बेपत्ता छन् ।
शनिबार राति मोन्तिजोस्थित समुद्रमा सामुद्रिक जीव खोज्ने क्रममा डुबेर धादिङको नेत्रावती डबजोङ गाउँपालिका–५, कटुञ्जेका ३० वर्षीय धनबहादुर तामाङको मृत्यु भएको हो । सोही स्थानका ३८ वर्षीय टेकबहादुर तामाङ बेपत्ता छन् ।
दुवैजना शनिबार राति बेपत्ता भएका थिए । बेपत्तामध्ये धनबहादुरको शव उद्धार टोलीले आइतबार समुद्रमा भेट्टाएको थियो । टेकबहादुर हालसम्म बेपत्ता रहेका तामाङ समाज पोर्चुगलका अध्यक्ष गोपाल योञ्जनले जानकारी दिए ।
धनबहादुर र टेकबहादुरसहित अरू दुई नेपाली पनि सामुद्रिक जीव खोज्न गएका थिए । बेपत्ता टेकबहादुरको झोला र बाल्टी मात्र भेटिएको योञ्जनले बताए ।
धनबहादुरको शव परीक्षणका निम्ति मोन्तिजोस्थित बरेइरो अस्पतालको शवगृहमा राखिएको छ । उद्धार टोलीले शनिबारदेखि नै विभिन्न माध्यममार्फत बेपत्ताको खोजी गरिरहेको छ ।
धनबहादुर वैदेशिक रोजगारीको सिलसिलामा फ्रान्स हुँदै गत वर्ष पोर्चुगल आएका थिए । यस्तै, चार महिनाअघि क्रोएसिया आएका टेकबहादुर १८ दिनअघि मात्र पोर्चुगल आएका थिए । दुवैजना नाताले काकाभतिज पर्छन् । दुवैजना मोन्तिजोमा बस्दै आएका थिए । रासस
