काठमाडौं । ‘कुकुल्यान्ड’ प्रकरणमा प्रधानमन्त्री पुष्पकमल दाहाल ‘प्रचण्ड’ मुछिएको भन्दै छानबिनको मागसहित प्रतिनिधिसभाअन्तर्गतको सार्वजनिक लेखा समितिमा उजुरी दिइएको छ । उक्त प्रकरणमा छानबिनको माग गर्दै उजुरी परेको समितिका एक सदस्यले जानकारी दिए ।

कुकुल्यान्ड बेलायती पत्रकार टम बरजिसको पुस्तक हो । उनको पुस्तकमा नेपालको टेलिकम व्यापारमा भएको भ्रष्टाचारको वृत्तान्त खोतलिएको सञ्चारमाध्यममा समाचार सार्वजनिक भएपछि यस विषयमा बहस भइरहेको छ ।

प्रधानमन्त्री पुष्पकमल दाहाल ‘प्रचण्ड’, व्यवसायी अजेय सुमार्गीलगायत व्यक्तिका विषय पुस्तकमा उल्लेख गरिएको समाचार प्रकाशित भएका छन् । यसैका आधारमा उजुरी परेको ती सदस्यले बताए ।

“सञ्चारमाध्यममा आएको समाचारको आधारमा उजुरी आएको मलाई जानकारी आएको छ,” ती सदस्यले बाह्रखरीसित भने ।