काठमाडौं । इलाम क्षेत्र नम्बर–२ को उपनिर्वाचनका निम्ति नेपाली कांग्रेसका तर्फबाट डम्बर खड्काले उमेदवारी दर्ता गराएका हुन् । उनी पार्टीको जिल्ला सभापति र गएको निर्वाचनमा सुवासचन्द्र नेम्वाङसँग पराजित नेता हुन् ।
उनीबाहेक उपनिर्वाचनका निम्ति इलाम–२ मा नेकपा (एमाले)का तर्फबाट सुहाङ नेम्वाङले उमेदवारी दर्ता गराएका छन् । उनलाइ नेकपा (माओवादी केन्द्र)ले पनि साथ दिएको छ ।
जिल्ला निर्वाचन कार्यालयका अनुसार हालसम्म खड्का र सुहाङसहित नेकपा (एकीकृत समाजवादी)का तर्फबाट जितबहादुर राई‚जनमत पार्टीका प्रेमकुमार थाम्सुहाङ (प्रेमदीप)‚ नेमकिपाका श्यामबहादुर दर्जी‚ मंगोल नेसनल अर्गनाइजेसनका मनिकुमार लिम्बू र डाकप्रसाद गौतमले स्वतन्त्र रूपमा उमेदवारी दर्ता गराएका छन् ।
इलाम–२ मा सुवास नेम्वाङको निधनपश्चात् रिक्त पदमा उपनिर्वाचन गर्न लागिएको हो । आउँदो वैशाख १५ गते उपनिर्वाचन हुँदै छ ।
