गजल — १ 
कहिले जित भयो, कहिले हार भयो तिमीसँग
यसै गरीगरी मेरो, घरबार भयो तिमीसँग

कहाँ जन्मेर कहाँ पुग्छ, यात्रा जिन्दगीको
अबको यात्रा सँगै, यही विचार भयो तिमीसँग

पुलकित छँदै छ जीवन, तिम्रो आगमनले
बेजोड जम्यो जोडी हाम्रो, दमदार भयो तिमीसँग

लाग्छ, यसै गरीगरी बितोस् जिन्दगानी
मनभित्रका सपनाहरू, साकार भयो तिमीसँग 

मन फेर्न मिल्ने भए, धड्कन फेर्न मिल्ने भए 
बाँकी यही त रह्यो अरू, हजार भयो तिमीसँग

०००

गजल — २
लाग्दै छ प्यारको बदला प्यार को गर्छ !
झरेर जाने आँसुको व्यापार को गर्छ !

सफर एक्लै त गर्नु छ सानो मन नगरी 
झन् यही मन सानो भए उद्धार को गर्छ ! 

म रातभर यही सोचेँ, सकिनँ निदाउनै 
आफ्नै थकित तनको उपचार को गर्छ !

माफ गरिदिन्छु है साँच्चै मागे तिमीले 
एकपटक भन्दै फेरि बारबार को गर्छ !

कोही त साथ दिने आए हुन्थ्यो नि बरै 
खास साथ नदिनेको इन्तजार को गर्छ !